Elvin Cəfərquliyev: “Çelsi”nin zəif tərəflərini meydanda göstərmək lazımdır”

“Böyük komandaya qarşı oynayacağıq. Bunun fərqindəyik. Həm inamlı, həm mübariz, həm də səbirli olmalıyıq. Bu matçın mahiyyətini bilirik. Sabah bütün Azərbaycanın gözü üzərimizdə olacaq. Buna baxmayaraq, komanda olaraq çox rahat oynamalıyıq”.

Futbolxeber.az saytının məlumatına görə, bu sözləri "Qarabağ"ın müdafiəçisi Elvin Cəfərquliyev UEFA Çempionlar Liqasının Liqa mərhələsinin 4-cü turu çərçivəsində sabah Bakıda "Çelsi"yə qarşı keçiriləcək oyun üçün təşkil edilən mətbuat konfransında deyib.

O, İngiltərə nəhəngi ilə oyuna hazır olduqlarını bildirib: "Çelsi"ni analiz etmişik. Mənfi və müsbət tərəflərini bilirik. Bir az fərqli sistemdə oynayırlar. "Çelsi"nin fərdi baxımdan güclü futbolçuları var. Ani bir səhv hər şeyi həll edə bilər. Çox diqqətli olmalıyıq. Ümumilikdə isə oyuna hazırıq".

- Məşq etmək çətindir, yoxsa meydanda emosiyaları cilovlamaq?

- Nə deyə bilərəm? Mənim xarakterim elədir ki, aqressivlik, çılğınlıq var. Amma hər iki tərəfdə də yaxşı məşq edirəm ki, hər şey mənim üçün müsbət tərəfə yönəlsin, mənfi tərəf olmasın. Məşq etmək də asandır.

- Mediada yayılan xəbərlərə görə, sabah “Çelsi”nin sağ cinahında böyük ehtimalla, Estevao Villian oynayacaq. Rəqibi təxribata çəkən, vərəqələr aldırmağı bacaran futbolçudur. Ona qarşı xüsusi hazırlaşmısanmı?

- Bu cür böyük oyunlarda temp yüksək olur. Birəbir mübarizələrdə yaxşı olmağı bacarmalısan. Bu cür oyunları çox oynamışıq. İşimizi, harada nə etməli olduğumuzu bilirik. Mübarizələrdə vərəqə yox, top almağı fikirləşirəm.

- “Çelsi”nin hansı axsayan tərəfi var?

- Onların zəif tərəflərini danışmasam, yaxşıdır. Meydanda göstərmək lazımdır. Təhlillər etmişik, oyunun gedişində yüksək pressinq tətbiq edirlər. Eyni zamanda boşluq da verirlər. Sabah bundan yararlanmaq lazımdır.