Samir Abasovu niyə qınayırsınız ki...

Son günlər istər jurnalistlər, istərsə də sosial şəbəkə istifadəçiləri arasında “Neftçi”nin baş məşqçisi Samir Abasovu qınayanlar var. Yox, bu, “ağ-qaralar”ın nəticələri ilə bağlı deyil. Hər halda nəticə baxımından Samir Abasov indi bu mövsüm heç vaxt olmadığı qədər rahatdır. Son 10 günə qədər “Neftçi” 8 oyundan yalnız 1-də qələbə qazanmışdısa, son 3 görüşdə komanda maksimum nəticə göstərib. Tənqid predmeti qapı xətti ilə bağlıdır.

Məlumdur ki, millimizin əsas qapıçısı Şahruddin Məhəmmədəliyev cəzalı olduğu üçün DÇ-2026-nın seçmə mərhələsi çərçivəsində noyabrın 13-də Bakıda İslandiyaya qarşı matçda meydana çıxa bilməyəcək. Belədə qapı xəttində Ayxan Abbasovun ya “Zirə”dən Aydın Bayramova, ya da “Neftçi”dən Rza Cəfərova şans verəcəyi ehtimal olunur. İddia edilir ki, məhz bu amili nəzərə alaraq, Samir Abasov son görüşlərdə qapıda Kenan Piriçə yox, Rza Cəfərova şans verməli idi. Necə ki, son iki turda Rəşad Sadıqov əsas heyətdə Tiaqo Silvaya yox, Aydın Bayramova şans verib. Lakin nə bu müqayisə düzgündür, nə də Abasovun qınanması.

Birincisi, nəinki Samir Abasovun, ümumiyyətlə heç bir klub məşqçisinin millinin heç bir əhəmiyyət kəsb etməyən oyununu düşünmək, öz komandasının nəticəsini riskə atmaq kimi bir öhdəliyi yoxdur. Tutaq ki, Samir Abasov Rza Cəfərova şans verdi və qapıçının səhvi ucbatından “Neftçi” xal itirdi. Bu zaman kimsə Abasova deyəcək ki, “çox sağ ol, xal itirsən də, millini düşünürsən”. Əlbəttə ki, yox!

İkincisi, Aydın Bayramov ötən mövsüm “Zirə”nin əsas qapıçısı olub və komandasının gümüş medal qazanmasında böyük pay sahibi olub. Hətta yaddaşım məni aldatmırsa, Bayramov ötən mövsüm qapısını ən çox toxunulmaz saxlayan yerli qolkiper idi. Eləcə də Rəşad Sadıqov Aydın Bayramova “Sabah”a 0:3 hesabı ilə məğlub olduqları oyundan sonra şans verib. Yəni böyük hesablı məğlubiyyətdən sonra baş məşqçinin qapı xəttində dəyişiklik etməsi normal haldır.

Üçüncüsü də, istər Fernandu Santuşun vaxtında, istərsə də Ayxan Abbasovun dönəmində milli komandaya klubunda oynamayan qapıçılar dəvət alır. Rza Cəfərov, yaxud Aydın Bayramov məgər buna qədər milliyə dəvət alarkən klublarında meydana çıxırdılar? Əgər milliyə qapıçılar klublarında oynamağa görə dəvət alsaydılar, o zaman Mehdi Cənnətov gərək hər toplanışda yığmaya çağırılardılar. Odur ki, Samir Abasovu qınamağa dəyməz. Üstəlik, MOİK-lə oyun göstərdi ki, “Neftçi”nin baş məşqçisi ikinci qapıçı kimi Rza Cəfərovu yox, Emil Balayevi görür...

TAĞI