Emmanuel Addai: “Kopenhagen”ə qol vuracağıma inanırdım”

“Qarabağ”ın hücumçusu Emmanuel Addai Azərbaycan Premyer Liqasının VII turunda “Kəpəz”i 1:0 hesabı ilə məğlub etdikləri oyundan sonra jurnalistlərin suallarını cavablandırıb. Futbolxeber.az saytının əməkdaşının da iştirak etdiyi müsahibəni təqdim edirik:

- Qələbəni necə şərh edərdiniz?

- Heç də asan oyun alınmadı. Hiss olunurdu ki, “Kəpəz” bu matça ciddi hazırlaşıb. Bilirdik ki, onlarda baş məşqçi dəyişikliyi olub. Bununla belə, qələbə qazandıq. Minimal hesabla olsa da, istəyimizə çatdıq, 3 xal qazandıq.

- “Kopenhagen”lə görüşdən sonra bu matça köklənmək çətin olmadı?

- “Kopenhagen”lə oyunda stadionda möhtəşəm atmosfer var idi. Dolu tribunalar önündə oynamaq çox xoşdur. Təəssüf ki, çempionat oyununda eyni izdihamı görmürük. Lakin yenə də bizi dəstəkləyən azarkeşlərə minnətdaram. Ümid edirəm ki, növbəti matçlarda onların sayı daha da çox olacaq.

- Çempionlar Liqasında 2 oyundan sonra 6 xal qazanmısınız. “Qarabağ”ın ilk 24-lüyə düşmək şansını necə dəyərləndirirsiniz?

- Düzdür, bəlkə də ardıcıl iki qələbədən sonra pley-off bu barədə düşünmək olar. Lakin tələsmək lazım deyil. Arxayınlaşmaq da olmaz. Hər növbəti matçı düşünməliyik. Bu iki qələbədən sonra dayanmamalıyıq. Qarşıdakı matçlarda da əlimizdən gələni edəcəyik. Bununla belə, unutmayaq ki, növbəti rəqiblərimiz də çox güclüdürlər.

- “Kopenhagen”lə görüşdə vurduğunuz qol Çempionlar Liqasında həftənin ən yaxşısı seçildi. Bu, sizin üçün gözlənilməz olmadı?

- Mən hər zaman qol vurmaq istəyirəm. Fərqi yoxdur, əsas heyətdə meydana çıxdım, ya sonradan oyuna qoşuldum. Çox şadam ki, “Kopenhagen”lə görüşdə istəyimə çatdım. Ümumiyyətlə, həmin görüşdə qol vuracağıma inanırdım. Qolun gözəl alınması, həftənin ən yaxşı seçilməsi sevincimi ikiqat artırdı. Bu, xüsusi bir hissdir.  

- Milli komandaların oyunlarına görə ikihəftəlik fasilə yaranacaq. Bu, hazırda yaxşı formada olan “Qarabağ”a mənfi təsir edə bilər?  

- Düşünmürəm. Peşəkar komandayıq. Baş məşqçimiz lazımi tapşırıqlarını verəcək. Qısa istirahətdən sonra məşqləri bərpa edəcəyik.

TAĞI