"Nə qədər oynamaq önəmli deyil, əsas komandaya xeyir verməkdir”

“İmişli” yaxşı komandadır. Heyətlərində güclü futbolçuları var. Buna görə də oyunun çətin olacağını bilirdik. Qarşılaşmaya yaxşı hazırlaşmışdıq. Şükürlər olsun ki, qələbə qazandıq”.

Futbolxeber.az saytına müsahibəsində bu sözləri “Araz-Naxçıvan”ın kapitanı Urfan Abbasov Azərbaycan Premyer Liqasının VII turunda “İmişli”ni 2:0 hesabı ilə məğlub etdikləri oyun barədə danışarkən deyib.

O, bu dəfə start heyətində yer almamasına, sonradan meydana daxil olmasına belə münasibət bildirib: “Bu, baş məşqçinin qərarıdır. Mən də Elmar müəllimin seçiminə hörmətlə yanaşıram. Fərqi yoxdur, start heyətində yer aldım, ya 3-5 dəqiqə meydanda oldum. Nə qədər oynamaq önəmli deyil. Əsas odur ki, komandaya xeyir verək”.

Son 2 turda qələbə qazana bilməyən “Araz-Naxçıvan” “İmişli” ilə görüşdə uğursuzluğa son qoydu. U.Abbasov qeyd edib ki, bu, komandada ab-havanı düzəldəcək: “Əlbəttə, qələbədən sonra hər şey yaxşı olur. Ümumilikdə, komandada heç bir problem yoxdur. Sadəcə son 2 turda qalib gələ bilməmişdik. Sevindirici haldır ki, uğursuzluğun uzanmasına imkan vermədik”.

Təcrübəli müdafiəçi ilk 7 turu komandası üçün belə dəyərləndirib: “Komandamız keyfiyyətli futbolçulardan ibarətdir. Bəzi oyunlarda konsentrasiya baxımından əziyyət çəkirdik. Buna görə də xallar itirdik. Tam köklənəndə, hər şey istədiyimiz kimi olur. İnanıram ki, növbəti turlarda daha yaxşı edəcəyik”.  

O, milli komandamızın qarşıdakı Fransa və Ukrayna ilə oyunlarından da söz açıb: “Millimizi 2 ağır oyun gözləyir. Komandaya uğurlar arzulayıram. Canla-başla millinin forması üçün mübarizə aparmaq lazımdır”.

“Araz-Naxçıvan”ın kapitanı milli komandamızın müvəqqəti Ayxan Abbasova tapşırılmasını müsbət dəyərləndirib: “Millidə azərbaycanlı baş məşqçinin olması yaxşıdır. O, atmosferi hiss eliyir, oyunçuları tanıyır”.

Fərəc Aslanov