Elvin Bədəlov: “İnanıram ki, bu qələbə sayəsində “qara zolaq”dan çıxacağıq”

“Sumqayıt səfəri həmişə çətin olur. İstənilən komanda burada əziyyət çəkir. Bunu bilirdik. Üstəlik, rəqib yaxşı formada idi”.

Futbolxeber.az saytına müsahibəsində bu sözləri “Neftçi”nin müdafiəçisi Elvin Bədəlov Azərbaycan Premyer Liqasının V turunda “Sumqayıt”ı səfərdə məğlub etdikləri oyun barədə danışarkən deyib.

Təcrübəli müdafiəçi 2:0 hesablı qələbəni belə şərh edib: “Hər oyunda olduğu kimi, bu dəfə də qol epizodlarımız oldu. İlk hissə ilə müqayisədə fasilədən sonra daha yaxşı oynadıq. Ola bilər, ümumilikdə gözəl futbol olmadı. Amma qələbə qazanıb, təzyiqi üzərimizdən atmalıydıq. Çox şükür ki, buna nail olduq. Bu gün üçün qələbə daha vacibdir”.

O, “Neftçi”nin mövsümdə ilk qələbəsini yalnız beşinci turda qazanmasına belə münasibət bildirib: “Komandada hər hansısa problem yoxdur. Oyun var, hər matçda qol epizodlarımız olurdu. Bəzən belə uğursuz seriyalar olur... Bu da komandada təzyiq yaradır. Qol vurandan sonra davamı gələcək demişdim. “Sumqayıt”la görüşdə hesabı açdıqdan sonra ikinci qolu vurduq. İnanıram ki, bu qələbə sayəsində “qara zolaq”dan çıxacağıq”.  

Son illər “Sumqayıt”ın formasını geyən Bədəlov bu dəfə sabiq klubuna qarşı rəqib kimi oynamağın ona fərqli hisslər yaşatdığını söyləyib: “Həm “Neftçi”, həm də “Sumqayıt” azarkeşləri möhtəşəm idilər. Stadionda əla atmosfer var idi. “Sumqayıt”a qarşı oynayarkən qəribə hisslər keçirdim. Bunu sözlə ifadə edə bilmərəm”.

30 yaşlı müdafiəçi növbəti turda “Karvan”a qarşı keçirəcəkləri oyuna yalnız qələbə üçün çıxacaqlarını vurğulayıb: “Evdə oynayırıq. 3 xal bizim olmalıdır. Meydana yalnız qələbə üçün çıxacağıq. Turnir cədvəlində irəliləməliyik”.

Fərəc Aslanov