Musa Qurbanlı: “Türkiyə klublarına örnək ola biliriksə, bu, bizim üçün çox xoşdur”

“Qarabağ”ın hücumçusu Musa Qurbanlının Azərbaycan Premyer Liqasının beşinci turunda “Araz-Naxçıvan”a 5:0 hesabı ilə qalib gəldikləri oyundan sonra jurnalistlərin suallarını cavablandırıb. Futbolxeber.az saytının əməkdaşının da iştirak etdiyi müsahibəsini təqdim edirik:

- Görüşlə bağlı nə deyə bilərsiniz?

- “Araz-Naxçıvan” yaxşı komandadır. Bilirdik ki, asan olmayacaq. Erkən qol vurduq. Daha sonra rəqibin 10 nəfərlə qalması işimizi asanlaşdırdı. Yekunda 5 qollu qələbə qazandıq. Azarkeşlər üçün də bu nəticə çox xoşdur.

- Hesab arasındakı fərqin belə böyük olacağınız gözləyirdiniz?

- Hesab barədə oyundan əvvəl düşünmürük. Yalnız qələbə üçün meydana çıxırıq. Hesabın elə də fərqi yoxdur.

- Ramil Şeydayev “Qarabağ”a qayıtdı. Demək olar ki, onun gəlişi ilə hücum xəttindəki rəqabət daha da artacaq?

- Ramil daha əvvəl komandamızın üzvü olub. Onunla birlikdə uğurlar qazanmışıq. Şəxsi münasibətimiz də yaxşıdır. Biz onu çox istəyirik. İnanıram ki, bu keçid həm Ramil üçün uğurlu olar, həm də komandamız üçün.

- “Benfika” ilə oyundan sonra ölkə çempionatına köklənmək çətin deyil?

- Əlbəttə, iki oyun arasında fərq böyükdür. Həm atmosfer fərqlidir, həm meydanın keyfiyyəti, həm də oyunun sürəti. Lakin Çempionlar Liqası da bizim üçün vacibdir, Azərbaycan çempionatı da. Hər ikisində öz oyunumuzu göstərib qələbə qazanmağa çalışırıq.

- Bütün Avropa “Qarabağ”ın səfərdə “Benfika” üzərində əzmkar qələbəsindən danışır. Hansı hisslər keçirirsiniz?

- Bu, bizim üçün böyük fəxrdir. Ölkəmizi təmsil edirik. Çempionlar Liqası dünya futbolunun 1 nömrəli klub turniridir. İnsanlar qələbəmizi gözləmirdilər. Çünki “Benfika”nın necə böyük klub olduğunu bilirsiniz. Bu qələbə sayəsində ölkəmizi tanıtdıq, göstərdik ki, Azərbaycanda da futbol var. Biz də futbol oynaya bilirik.

- Maraqlıdır ki, əvvəl Türkiyə klublarını bizə örnək göstərdirlər, indi isə “Qarabağ” qardaş ölkənin kollektivlərinə nümunə göstərilir...

- Kimlərəsə örnək ola biliriksə, bu, bizim üçün çox xoşdur. Bu, işimizə peşəkar yanaşmağımızın nəticəsidir. 

TAĞI