“Sabah”dan növbəti biabırçılıq: Komanda hava limanından geri qaytarıldı

Azərbaycan futbolunda növbəti biabırçı hal yaşanıb.

Futbolxeber.az saytının sportnet.az-a istinadən verdiyi məlumata görə, "Sabah" klubunda rəhbərlik səviyyəsində biabırçı olay baş verib. Klubun 12 yaşadək futbolçulardan (2014-cü il təvəllüdlü) ibarət komandası Şimali Makedoniyaya 25 nəfərlik heyətlə yollanmaq istəyib. Bu məqsədlə biletlər alınıb, turnirdə iştirak təsdiqlənib, hətta komandanın qarşılaşacağı rəqiblər də müəyyənləşib.

Lakin Bakı - İstanbul - Skopye təyyarə reysi ilə səfərə çıxmaq istəyən komanda Heydər Əliyev Beynəlxalq Aeroportundan geri qaytarılıb.

Valideynlərdən birinin Sportnet.az-a verdiyi məlumata görə, hava limanında onlara bildirilib ki, Şimali Makedoniyaya giriş viza ilədir. "Sabah" rəhbərliyi isə bunu öncədən bilmədən, birbaşa uçuş üçün bilet alıb.

Klubun məsul şəxsləri Şimali Makedoniya ilə Azərbaycan arasında bu yaxınlarda viza rejiminin tətbiqindən xəbərsiz olublar. Nəticədə bunu bilmədən bilet alınıb. Səfərin baş tutmaması kluba böyük məbləğdə ziyan bahasına başa gəlib. Çünki alınan biletlərin pulunu gediş günündə geri qaytarmaq mümkünsüzdür.

Klubun mətbuat katibi Elnur Həmidov isə biabırçılıqla bağlı açıqlama vermək istəməyib.

Göründüyü kimi, belə bir tragikomik olayda nə komandanın, nə də məşqçi heyətinin günahı var. Bu, birbaşa "Sabah" klubunda təşkilati işlərə cavabdehlik daşıyanların səriştəsizliyi, məsuliyyətsizliyi, səhlənkarlığıdır.