Kapitan gəmini tərk etməməsindən danışdı: “Səbail”i Premyer Liqaya qaytarmalıyıq”

“Uzun müddətdir rəsmi oyun keçirmirdik. Buna görə hər şey istədiyimiz kimi olmadı. Lakin əsas odur ki, qalib gəldik və mövsümə 3 xalla başladıq”.

Futbolxeber.az saytına müsahibəsində bu sözləri “Səbail”in kapitanı Yusif Nəbiyev I Liqanın ilk turunda “Mingəçevir”ə 3:1 hesabı ilə qalib gəldikləri oyun barədə danışarkən deyib.

O, bir qədər zamana ehtiyac duyduqlarını bildirib: “Komandamız tam hazırdır, heyət komplektləşib. Bir qədər vaxt lazımdır. Bir neçə oyun keçirdikdən sonra daha yaxşı formada olacağıq. İnanıram ki, tezliklə baş məşqçimizin istədiyi səviyyəyə çatacağıq”.

“Çempionluq yolunda hansı komandalar “Səbail”ə rəqib ola bilər?” sualını 28 yaşlı müdafiəçi belə cavablandırıb: “Heç bir rəqibə hörmətsizlik etmək istəmirəm. Hamısı güclüdür. Hər bir komanda meydana qələbə üçün çıxır. Heç kim əvvəldən təslim olmur. Biz də hər matçda qalib gəlmək, yenidən çempion olmaq istəyirik”.

Ötən mövsüm yekunlaşdıqdan sonra “Səbail” I Liqaya düşdü və əksər futbolçular komandadan ayrıldı. Lakin kapitan gəmini sonda da tərk etmədi: “Açığı, təkliflər var idi. Rəhbərlik, baş məşqçi komandada qalmağımı istədi. Kollektivdə çox yaxşı ab-hava var. Ötən il “Səbail” I Liqaya düşdü. Bunun günahkarı biz futbolçularıq. Ona görə də “Səbail”i Premyer Liqaya geri qaytarmalıyıq”.

İbrahim Cəfərov