Mateuş Koxalski: “Başla vurulan o zərbəni qaytarmaq olduqca çətin idi"

“Qarabağ”ın qapıçısı Mateuş Koxalskinin Futbolxeber.az saytına müsahibəsi

- Çempionlar Liqasının əsas mərhələsində oynamaq sizin üçün nə deməkdir?

- Həmişə Çempionlar Liqasının əsas mərhələsində oynamaq istəmişəm. Ürəyim doludur, çox şey demək istəyirəm. Olduqca xoşbəxtəm. Düşünürəm ki, azarkeşlərimiz önündə gözəl oyun sərgilədik. Mövsüm ərzində tarix yazmağı bacardıq.

- Son dəqiqələrdə etdiyiniz kritik qurtarışları necə şərh edərdiniz?

- Başla vurulan o zərbəni qaytarmaq olduqca çətin idi. Sadəcə bu, məndə instinkt olaraq formalaşıb. Qurtarış edib komandaya fayda verməkdən məmnunam.

- Çempionlar Liqasında qarşılaşmaq istədiyiniz xüsusi bir rəqib var?

- Mənə görə fərq etmir. Sadəcə olaraq komanda şəklində böyük stadionlarda oynamaq xoş olar. Dünyanın ən yaxşı komandalarına qarşı çıxış etmək istəyirik. Mənim də arzum "Real", "Barselona" kimi komandalara qarşı oynamaqdır. Bu, olduqca maraqlı olar.

- Polşa millisində üçüncü qapıçısınız. “Qarabağ”dakı uğurlu çıxışınız millidəki yerinizi daha da yaxşılaşdıra bilər?

- Bunu dəqiq deyə bilmərəm. Milli komandada, dünya səviyyəli liqalarda oynayan kifayət qədər yaxşı qapıçılarımız var. Mən həmişə əlimdən gələnin ən yaxşısını etməyə çalışıram. Milli komandada yeni baş məşqçi var. Onun da gözündə yüksəlmək istəyirəm. Nə olacağını birlikdə görəcəyik.

Azad Nuriyev