“Ferensvaroş”un qapıçısı: “Qarabağ” “vaxt öldürmək” baxımından yaxşı iş gördü”

“Qələbə üçün hərşeyimizi verdik. Bilirdik ki, vuracağımız ilk qol önəm daşıyacaq. Bunu bacardıq. Daha sonra oyunu bərabərləşdirmək üçün də imkanımız oldu. Bununla belə, qol vurandan sonra xeyli səhvlər etdik”.

Futbolxeber.az saytına müsahibəsində bu sözləri “Ferentsvaroş”un qapıçısı Deneş Dibuş “Qarabağ”a qarşı keçirilən UEFA Çempionlar Liqasının pley-off mərhələsinin cavab görüşünü şərh edərkən deyib.

34 yaşlı qapıçı Ağdam klubuna 3:2 hesabı ilə qalib gəldikləri görüşü belə şərh edib: “Səhvlərin nəticəsində ardıcıl qollar buraxdıq. Xüsusilə, hissənin sonunda qol buraxmağımız bütün planlarımızı pozdu. "Qarabağ" əks-hücumda olduqca effektiv idi və bunun da bəhrəsini gördü. Onlar qələbəyə layiq idilər. Vurduqları 2 qol onlara tarixi zəfər qazandırdı”.

“Geridönüş etmək üçün nə çatışmadı?” sualını macar qolkiper belə cavablandırıb: “İlk hissədən sonra etdiyimiz dəyişikliklər matçda da mənzərənin dəyişməsinə səbəb oldu. Hesab bizim xeyrimizə çevrildi. Hücumda daha aqressiv, istəkli oynadıq. Sürətimiz, texnikamız hesabına qollar vura bildik. Ardıcıl fərqlənməyimiz bizə xeyli güc verdi. Buna görə də son 10 dəqiqə qələbə üçün oynadıq. 3-cü qolu da vurduq, ardınca ümumi hesabı bərabərləşdirmək imkanı qazansaq da, fərqlənə bilmədik. Rəqib qapıçı olduqca baxımlı seyv etdi”.

Ümumi nəticədə məğlubiyyətə baxmayaraq, D.Dibuş komandası ilə fəxr etdiyini vurğulayıb: "Qarabağ" son dəqiqələrdə “vaxt öldürmək” baxımından yaxşı iş gördü. Bununla belə, komandamla fəxr edirəm. Döyüşdük, mübarizə apardıq. Eyni zamanda, "Qarabağ"ı da təbrik edirəm. Çempionlar Liqasında uğurlar arzulayıram”.

Azad Nuriyev