"Ferensvaroş"un hücumçusu: "Vəziyyəti dəyişmək üçün əlimizdən gələni edəcəyik"

"Etiraf etməliyik ki, ilk oyun planlaşdırıldığı kimi getmədi. İlk hissə bizim üçün yaxşı göründü, amma fasilədən sonra oyun ritmini itirdik və rəqibin bizdən üstün olmasına imkan verdik".

Futbolxeber.az saytının məlumatına görə, bu sözləri index.hu-ya müsahibəsində "Ferensvaroş"un hücumçusu Qruber Zombor UEFA Çempionlar Liqasının pley-off mərhələsinin "Qarabağ"la cavab oyunu öncəsi deyib.

20 yaşlı hücumçu bildirib ki, ilk görüşdə qeydə alınan 1:3 hesablı məğlubiyyətdən sonra mərhələ keçmək çətin görünsə də, bunun üçün gücləri var: "Bu, asan vəziyyət deyil, amma oyunu dəyişmək üçün əlimizdən gələni edəcəyik. Hamımız Çempionlar Liqasının əsas mərhələsində oynamaq istəyirik. Ötən çərçənbə axşamı kimsə soyunub-geyinmə otağına girsəydi, necə qəzəbli olduğumuzu görərdi. Çünki rəqib bizi şoka salmışdı. "Qarabağ"ı məğlub etmək üçün kifayət qədər gücə qadir olduğumuzu hiss edirik. Amma bunun üçün şanslarımızdan daha yaxşı istifadə etməliyik".

Qruber bildirib ki, komandada heç kim Avropa Liqası haqda düşünmür: "Öz komandamın oyunundan əvvəl Çempionlar Liqasının himnini dinləyə bilmək mənim üçün bir xəyal idi. Hamımız bunu payızda meydanda ən azı daha 8 dəfə eşitmək istəyirik. 8 məğlubiyyət alacağımızı əvvəlcədən bilsəydim, yenə də Çempionlar Liqasında iştirak etməyi seçərdim. Nə qədər ki, daha böyük məqsədə çatmaq şansımız var, diqqətimizi başqa bir şeyə yönəltmək niyyətimiz yoxdur".

Qeyd edək ki, "Qarabağ"la "Ferensvaroş" arasında bu gün Tofiq Bəhramov adına Respublika stadionunda keçiiriləcək cavab görüşü saat 20:45-də başlayacaq