Bəxtiyar Həsənalızadə: “Bir az xarakter lazım idi ki...”

“Oyun yorğunluq fonunda bizim üçün ağır keçdi. “Zirə” də iddialı komandadır. Ötən mövsüm ikinci yeri tutmuşdular. Meydanda yorğunluq hiss olunurdu. İstədiyimiz futbolçu sərgiləməsək də, nəticə pis deyil”.

Futbolxeber.az saytına müsahibəsində bu sözləri “Araz-Naxçıvan”ın müdafiəçisi Bəxtiyar Həsənalızadə Azərbaycan Premyer Liqasının ilk turunda “Zirə”yə qarşı keçirilən oyun (1:1) barədə danışarkən deyib.

O bildirib ki, UEFA Konfrans Liqasında “Omoniya”ya məğlubiyyətdən sonra “Zirə” ilə matça köklənmək çətin idi: “Xüsusən də psixoloji baxımdan. Bir az xarakter lazım idi ki, dəyişiklik edək. Çünki “Omoniya” ilə hər iki oyunda ağır məğlubiyyətlə üzləşmişdik. Səfərin uzunluğu da bir qədər psixoloji baxımdan çətinlik yaratmışdı. Şükürlər olsun ki, bütün çətinliklərə baxmayaraq, “Zirə” ilə matçda qənaətbəxş nəticə qazandıq”.

Matçda komandasının yeganə qolunun müəllifi olan 32 yaşlı müdafiəçi fərqləndiyi epizodu belə təsvir edib: “Hiss elədim ki, top gələ bilər və o istiqamətdə qaçdım. Şərait yarandı və fürsətdən istifadə etdim. Komandama xal qazandıran qola imza atdığım üçün şadam”.

B.Həsənalızadə Naxçıvan təmsilçisinin cari mövsümdəki hədəfindən də söz açıb: “Hədəfimiz avrokuboklara yollanmaqdır. 2-3-cü yerlər uğrunda mübarizə aparacağıq. Medalçılar sırasına düşmək istəyirik”.

TAĞI