Robbi Kin: “Ferensvaroş”la “Qarabağ”ın gücü bərabərdir”

“İki komandanın gücü demək olar ki, bərabərdir. Lakin istədiyimiz kimi oynasaq, rəqibə çox problem yarada bilərik”.

Futbolxeber.az saytının məlumatına görə, bu sözləri UEFA Çempionlar Liqasının pley-off mərhələsində sabah "Qarabağ"la qarşılaşacaq "Ferensvaroş"un baş məşqçisi Robbi Kin bu gün oyundan öncə təşkil edilən mətbuat konfransında deyib.

İrlandiyalı mütəxəssis Çempionlar Liqasının Liqa mərhələsinə vəsiqə şansını əldən verməməyə çalışacaqlarını bildirib: “Belə matçlarda əsas olan qol buraxmamaqdır. Çünki öndə elə hücumçularımız var ki, mütləq qol vurmaq imkanlarımız olacaq. Rəqib yaxşı komandadır, lakin bu oyun klubumuz üçün böyük fürsətdir. Çünki son illərdə Çempionlar Liqasının əsas mərhələsinə vəsiqə qazanmaq üçün o qədər də böyük şans olmayıb. Bu, həm futbolçu, həm də məşqçi kimi böyük motivasiyadır. Mən oyunçulardan intensivlik və ürəklə, ruhla mübarizə gözləyirəm”.

O, budəfəki qarşıdurmanın 2022-ci ildə Çempionlar Liqasının 3-cü təsnifat mərhələsində "Qarabağ"la "Ferenesvaroş" arasında keçirilən oyunlardan fərqlənəcəyini qeyd edib: "Üç il əvvəl "Qarabağ"la oyunu izləməmişdim. Bu isə tamamilə fərqli oyun olacaq. Hər iki komandanın yeni oyunçuları var. Əvvəlki Ceyms Bond filmlərinin heç biri sonuncusu ilə eyni deyil. Amma təbii ki, Azərbaycan çempionunun son oyunlarına baxmışam".

Qeyd edək ki, avqustun 19-da keçiriləcək "Ferentsvaroş" - "Qarabağ" oyunu Bakı vaxtı ilə saat 23:00-da start götürəcək. Cavab qarşılaşması avqustun 27-də Tofiq Bəhramov adına Respublika stadionunda olacaq və saat 20:45-də başlayacaq.