Qurban Qurbanov: “Sabah bərk durmağı bacarmalıyıq”

“Çox vacib oyundur. Çünki rəqib də çox iddialıdır. Əvvəlki oyunları haqda da demişdim ki, istəklidirlər, döyüşkəndirlər. Buna görə də sabah ola bilər ki, çox güc sərf edək. Matça pis hazırlaşmamışıq. Çox intizamlı oynamağa çalışmalıyıq. Futbolçularla danışmışıq, Yaxşı, maraqlı oyun olacaq. Hər iki komanda ilk görüşün nəticəsinə görə, qalib gəlməyə qadirdir. Bizim bir balaca üstünlüyümüz var, irəlidəyik. Çox ciddi 90 dəqiqə keçirməliyik”.

Futbolxeber.az saytının məlumatına görə, bu sözləri “Qarabağ”ın baş məşqçisi Qurban Qurbanov sabah UEFA Çempionlar Liqasının 3-cü təsnifat mərhələsinin cavab görüşü çərçivəsində Bakıda Şimali Makedoniyanın "Şkendiya" klubuna qarşı keçiriləcək matçdan öncə təşkil olunan mətbuat konfransında deyib.

Mütəxəssis bildirib ki, “Şkendiya” barədə düşüncələri dəyişməyib: “Əvvəl də demişdim ki, "Şkendiya" FKSB ilə iki oyunda qalib gələn komandadır. Hamı düşünürdü ki, FCSB qalib gələcək, Amma "Şkendiya" qələbə qazandı. Öz döyüşkənlikləri və xarakterləri ilə bunu bacardılar. Meydanda da şahid olduq. Sabah çox mobil komanda olmalıyıq, bərk durmağı bacarmalıyıq”.

Q.Qurbanov Kadi Borgesin ilk matçdakı intizamsız oyunu, qeyri-peşəkar davranışları fikri ilə razılaşmayıb: “Əslində, belə deyil. Futbolçularımın hamısı son vaxtlarda həm məşqdə, həm oyunlarda istəkli, intizamlıdırlar. Kadi daha çox texnikalı oyunçudur. Bəlkə də top itkilərinin çox olduğunu fikirləşirsiniz. Ancaq rəqibi də nəzərə almaq lazımdır. Son vaxtlarda Avropa futbolunda komandalara baxsaq, top itkiləri çoxalıb. Futbol fərqli olmağa başlayıb. Kadiyə verilən tapşırıq var idi. Topsuz oyunda, müdafiə planında, bəzi hücumların qurulmasında taktiki tapşırıqları düzgün yerinə yetirirdi. Texniki səhvlər qaçılmazdır, həmişə olacaq. Kadinin daha yaxşı olmaq potensialı var”.

O, Emmanuel Addainin qeyri-stabil rejimdə olması, qidasına fikir verməməsi barədə fikirlərə belə münasibət bildirib: “İstənilən futbolçunun hansısa çatışmayan cəhətləri var. Daha çox özündən asılı olmayan... İstər-istəməz gəldiyi vaxtla indiki arasında çox fərq var. Oyununda yox, işinə yanaşmasında belədir. Bizim istəklərimizi yerinə yetirməsində çox böyük dəyişiklik var. İnsan orqanizmi fərqlidir. O rejimdən bizim Azərbaycan mətbəxinə düşüb. Dünyanın ən ləzzətlisi Azərbaycan mətbəxidir. Həqiqətən elədir. O da gəlib, bu cür yeməkləri görür, yeməklərə həvəsli olur. Əvvəl də var idi. Kiçik cərimələr də etmişik onu yeməklə bağlı (gülür). Bəzi insanlar fərqli, həssas olurlar. Gözümüz onun yediyi yeməkdə deyil. Bəzi narazılıqlar olub. Amma son vaxtlar hər şey qadasındadır. Özüm də bu yolu keçmişəm. İnsan bir həftə-10 gün yaxşı rejimdə olanda, iştahı çoxalır, yaxşı yeməklər yemək istəyir. Dəyişiklik çox olub. Ciddi problem deyil. Çox şey yaxşılığa doğru gedir”.

“Qarabağ”ın baş məşqçisi adının “Spartak”la hallanması barədə qısaca deyib: “Xeyr, təklif olmayıb”.

“Şkendiya” ilə ilk matçda hansı mövqenin çıxışı sizi qane etmirdi?” sualını Qurbanov belə cavablandırıb: “Çox açıqlamağa ehtiyac yoxdur. Sadəcə bir az səliqəli oynamağımız daha yaxşı olardı. Sadə top itkiləri yaşadıq. Elə oyunçular elə top itkisisinə yol verir ki, bunu nadir hallarda edirlər”.

O, ilk matçda qapını qoruyan Mateuş Koxalskinin sabahkı görüşdə də start heyətində yer almaq ehtimalının çox olduğunu vurğulayıb: “Hər bir halda, bəzi dəyişikliklər etmişik”.

Təcrübəli mütəxəssis Andre Klovisin komandaya gələcəyi barədə yayılan xəbərlərə də toxunub: “Çox futbolçu var ki, transfer siyahımızdadır. Onlardan biri də Klovisdir. Hamısına baxılır, müzakirə olunur. Bu gün desək ki, sabah onu gətiririk, doğru olmaz. Belə məlumat yoxdur. Danışıq gedən futbolçular çoxdur”.

O, yeni transfer Joni Montielin hazırlıq durumunun yaxşı olmadığını söyləyib: “Bir az vaxt lazımdır. Universal oyunçudur. Mərkəz oyunçusudur, amma sağ cinah hücumçusu oynamaq bacarığı da var. Sadəcə bir az vaxt lazım olacaq. Rotasiyalar çox edirəm. Bir neçə oyundan sonra tam bərpa olacaq. Orta və sağ cinahda lazım ola bilər”.

Pley-off matçlarına qədər hücumçu məsələsini həll edəcəkləri barədə suala cavabında Qurbanov deyib: “Transfer siyasəti elədir ki, bazarda satılmır ki, pulu verib gətirəsən. Nə qədər hücumçu transfer etmişik. Bir o qədər də yanılmamışıq. Yaxşı oyunçu gətirməyin həm üstün tərəfi, həm də bizə zərbə vuran tərəfi var. 3-5 yaxşı oyun oynadı, təkliflər başlayır və oyunçunu itiririk. Onu komandadan gedəndə itirmirik, amma bizdə olanda itirirk. Hansısa kluba "yox" cavabı verəndə, futbolçunun əhvalı korlanır. Hücumçuları alıb, sonra satmışıq. Dino Ndolovunu, İbrahima Vadjini, Juninyonu satdıq, Mahir Emreli getdi. Bunun həm yaxşı tərəfi var, digər tərədən isə bizə mane olur. Kollektiv formalaşdırırsan, oyun üslubu qurursan. Sabah birdən-birə oyunçunun əhvalı pozulur, başlayıram problem yaşamağa. Nəinki tək hücumçu, həm orta xətt, həm sol-sağ vinger, həm müdafiə üçün də oyunçu axtarırıq. Bir hücumçu gətirməklə dayanmayacağıq. Elə addım atmaq istəyirik ki, oyunçu və bizim üçün tam faydalı olsun. Təzyiqlər çoxdur, hamı hücumçu gözləyir, istəyir. İllərdir ki, hər il bunun müzakirəsini görmüşük. Son vaxtlar Klovislı bağlı çox məlumatlar gedir. Bizdən asılı olmayan şeylər var. Tək bir oyunçunu düşünmürük, kollektivi, gedişatı düşünürük. Kənardan çox rahat görünə bilər, amma işin içində elə detallar var ki, onu da nəzərə almalıyıq. Burada nə üçün işləyirik? Sizləri, azarkeşləri sevindirmək üçün. Futbolçularıma da bəzən deyirəm ki, biz illərdir lider olmaq istəyirik, liderlər sırasındayıq. Hər komanda bunu saxlaya bilmir. O qədər ölkələrin çempionları var, çempion olur, sonra 13-14-cü yerdə olurlar. Böyük beşlikdə də belə hallar baş verir. Ronaldo getdi, ikinci Ronaldo nə vaxt tapdılar? Ya da, Messi. Liderlərin problemi öndə olur, həm də asan olmur. Əlimizdə olanı qoruyub-saxalamlıyıq ki, oyun sistemimiz pozulmasın, nəticələrimiz ən azından olduğu kimi qalsın. Kreativ oyunçu axtarmağa daha çox vaxt ayırmışıq. Juninyonun xətrini çox istəyirəm, xarakterlidir. İspaniyadan, Braziliyadan təklif gəldi, onu itirdik. Onu et, bunu et deyirdik, edə bilmirdi. İstəyirdi. Amma psixoloji məsələ idi. Azarkeşlərimizə bildirim ki, narahat olmasınlar, çalışırıq, bütün detallara fikir verərək, oyunçu götürürük. Elə nüanslar var ki, bir-birimizə mane olur. Axtarışdayıq. Transfer pəncərəsinin son gününə kimi işimizi davam etdirəcəyik”.