AFFA-nın göyə sovurduğu 5 milyon...

“Karvan” Portuqaliyanın üçüncü liqasından yarımmüdafiəçi gətirib. Bu, Yevlax klubunun 8-ci legioner transferidir. “İmişli” isə məşqçilər korpusunu saymasaq, 6 əcnəbini heyətinə qatıb. 99 faiz əminəm ki, bu 14 legionerin maksimum biri, ya da ikisi Azərbaycan Premyer Liqasında oynayacaq səviyyədədir. Digərlərinin səviyyəsində elə hazırkı Azərbaycan futbolunda N qədər oyunçu tapmaq olar. Heyif Azərbaycanın pullarından...

Digər 10 klubun hər birindən kəsilən 500 min sayəsində “İmişli” və “Karvan”a ayrılan ümumilikdə 5 milyonun böyük hissəsi yararsız legionerlərə xərclənir. Niyə, nə üçün? Nə var-nə var AFFA özünü yaxşı göstərmək, ictimaiyyətin gözündə xal qazanmaq üçün bu iki komandanı Premyer Liqaya buraxıb, iştirakçı sayı 12-ə çatıb. Adını da qoyublar inkişaf. Yevlax klubu gedib Şamaxıda, İmişli klubu da Qubada oynayacaq. Budur inkişaf?

Üstəlik, bu komandalara şərait yaradılıb ki, əksər yaş qrupları üzrə komandaları olmasın, əvəzedici heyətləri də çempionatda iştirak etməsin. Uzun sözün qısası, 5 milyonun böyük hissəsini səviyyəsi yerlilərdən seçilməyən legionerlərə xərcləyin. Budur inkişaf? Heyif Azərbaycanın pullarından...

Hörmətli AFFA, belə inkişaf olmur. Bu yolla futbolu inkişaf etdirmək də olmaz. Bu, sadəcə 5 milyonun göyə sovrulmasıdır. Onsuz da gedişat göstərir ki, bu klubların Premyer Liqada qalması inandırıcı deyil. Əksəriyyətin də proqnozu belədir ki, mövsümün sonunda ya “İmişli” sonuncu olacaq, ya da “Karvan”. Belədə 1 mövsümlük həvəs üçün 5 milyonu göyə sovurmağa dəyərmi? Halbuki kəsdiyiniz o 500 min manata bu gün “Qəbələ”nin, “Şamaxı”nın, “Kəpəz”in daha çox ehtiyacı var...

İbrahim Cəfərov