Qara Qarayev: “Əlimizdən gələni edəcəyik ki, sabah qalib gələk”

"Araz-Naxçıvan"ın yarımmüdafiəçisi Qara Qarayev UEFA Konfrans Liqasının 3-cü təsnifat mərhələsinin ilk oyunu çərçivəsində "Omoniya"ya qarşı keçiriləcək matçdan öncə təşkil edilən mətbuat konfransında iştirak edib.

Futbolxeber.az saytının məlumatına görə, təcrübəli yarımmüdafiəçi Kipr təmsilçisi ilə matça hazır olduqlarını bildirib: “Ötən oyundakı qalibiyyət bizə daha çox yaxşı əhval-ruhiyyə verib. Sabahkı matça hazırıq. Yaxşı rəqibə qarşı oynayacağıq. "Omoniya" son vaxtlarda qarşılaşdığımız ciddi və təhlükəli rəqibdir. Onların müəyyən oyunları haqda təhlillər etmişik. Dinamik və sürətli oynayan komandadır. Bütün fikrimiz sabahkı qarşılaşmaya yönəlib. Əlimizdən gələni edəcəyik ki, ev amilindən yararlanaq və qalib gələk”.

O, azarkeşlərə səslənib: “Hər kəsi oyuna dəvət edirəm. Bizə daha da vacib olan azarkeş dəstəyidir. 12-ci oyunçu ilə sabah inamlı nəticə əldə edə bilərik”.

Q.Qarayev vaxtı ilə "Qarabağ"ın heyətində rəqib qismində oynadığı

"Omoniya" ilə indiki komandanı belə müqayisə edib: “Ciddi fərq var. Yeni baş məşqçi "Omoniya"ya yeni fəlsəfə gətirib. Əsas komandaya akademiyadan oyunçular cəlb edib. "Qarabağ"la oynadığımız "Omoniya" ilə hazırkı komanda arasında əsas fərq odur ki, indi hücum xətti daha aktivdir və oyunçular bir-birini daha yaxşı başa düşür. Hücum xətti və fəlsəfə tamam başqadır”.

32 yaşlı futbolçu bütün rəqiblərə hörmətlə yanaşdıqlarını söyləyib: “Klub olaraq hədəfimiz var. Bu hədəfə çatmaq üçün əlimizdən gələni edəcəyik. Nə qədər alınıb-alınmayacağı oyun vaxtı görünəcək. Biz hər şeyi edəcəyik. Fərq klublarda, adlarda deyil. Hədəfimizə çatmaq üçün hər şeyi edəcəyik”.

“Qarabağ”ın avrokuboklarda mərhələ keçdiyi ilk illərdə komandada oynamışdın. “Araz-Naxçıvan”da da addımlar atılır. Bənzərlik hiss edirsən?” sualını Qarayev belə cavablandırıb: “Əlbəttə, komanda yoldaşlarımla danışanda 2008-2009-cu illəri xatırlayıram. 2014-cü ilə qədər bir mərhələ, növbəti il iki mərhələ keçmişik. Böyümək üçün zaman lazımdır. "Araz-Naxçıvan" olaraq Liqa mərhələsini istəsək, bunun üçün böyük təcrübə və zaman lazımdır. Bənzərlik var. "Qarabağ"ın ilk illərdə atdığı addımları biz də atmışıq. Növbəti illərdə də daha yaxşı, daha inamlı addımlar ataraq Liqa mərhələsində oynamaq fürsəti əldə edərik”.