Rayan Senhadji: “Saşa İliçin “Sumqayıt”da baş məşqçi olması qərarıma təsir etdi”

“Sumqayıt”ın yeni transferlərindən olan Rayan Senhadjinin Futbolxeber.az saytına müsahibəsi

- Artıq bir neçə gündür “Sumqayıt”dasınız. İlkin təəssüratlarınız necədir?

- Təəssüratlarım əladır. Futbolçulardan tutmuş, məşqçilər korpusuna, tibbi, inzibati heyətə qədər hamı məni həqiqətən də çox yaxşı qarşıladı. Biz burada özümüzü ailə kimi hiss edirik. Klubda çox gözəl atmosfer var. Təlim-məşq toplanışımız da çox yaxşı keçir.

- Yəqin ki, digər təkliflər də var idi. Niyə məhz “Sumqayıt”ı seçdiniz?

- Bəli, başqa klublardan da təkliflər almışdım. Amma “Sumqayıt”dan özümə qarşı daha çox maraq hiss etdim. Klub rəhbərliyinin mənə göstərdiyi diqqəti yüksək qiymətləndirdim.

- Bura gəlməmişdən qabaq vaxtı ilə ölkəmizdə çıxış etmiş, yaxud hazırda oynayan hansısa futbolçularla məsləhətləşdiniz?

- Bəli, mən bir neçə fransızdilli oyunçu ilə danışa bildim. O cümlədən də Aleksandr Ramalinqomla. O, mənə “Sumqayıt” haqqında müsbət fikirlər söylədi. Klubda hər şeyin çox peşəkar və strukturlaşdırılmış olduğunu bildirdi.

- Ümumiyyətlə, Azərbaycan futbolu barədə nələr bilirdiniz?

- Müəyyən məlumatlarım var idi. Həmçinin avrokuboklarda çıxış edən komandaları da tanıyırdım.

- Yəqin ki, “Sumqayıt”ın baş məşqçisi Saşa İliçi ən azından əyani olaraq tanıyırdınız. Seçiminizdə onun hər hansı bir rolu oldumu?

- Bəli, Saşa İliçi tanıyıram. Onun keçmiş futbolçu karyerası haqda məlumatlıyam. Buna qədər onunla üç dəfə görüşmüşdük. Açıq deyim ki, İliçin burada məşqçi olması qərarıma çox təsir etdi.

- “Sumqayıt”dakı hədəfləriniz nədən ibarətdir?

-  Komandaya kömək etmək üçün buradayam. “Sumqayıt”ın bir parçası olmaq istəyirəm. Klubun qarşısına qoyduğu hədəflərə çatması üçün əlimdən gələni edəcəyəm.

- Karyeranıza baxarkən görürük ki, son illər demək olar ki, hər mövsümə yeni komandada başlayırsınız. Bu, nə ilə bağlıdır? “Sumqayıt”da bu “ənənə” pozulacaqmı?

- Olduğum bütün klublarda həmişə özümü ən yaxşı tərəfdən göstərməyə çalışmışam. Pilləkənləri bir-bir qalxmağa və ildən-ilə daha yüksək səviyyəyə çatmağa çalışmışam. Ola bilər ki, tez-tez klub dəyişməyimə səbəb budur. Lakin “Sumqayıt”la iki mövsümlük müqavilə imzaladıq. Bunun üçün çox xoşbəxtəm. Bu, mənə sabitlik verəcək və daha yaxşı çıxış etməyimə kömək edə bilər.

İbrahim Cəfərov