“Neftçi” yeni ev formasını təqdim etdi: eksklüziv retro dizayn, əbədiyyət, Banişevski...

“Neftçi” 2025/26 mövsümünün ev formasını təqdim edib.

Futbolxeber.az saytının klubun mətbuatın xidmətinə istinadən verdiyi məlumata görə, “ağ-qaralar”ın zəngin tarixindən ilhamlanan retro dizayn nümunəsidir.

Formanın üzərində 2026-cı ilin fevralında 80 illik yubileyini qeyd edəcəyimiz klub əfsanəsi Anatoli Banişevskinin “İdeal futbolçu silueti” adlanan xüsusi təsviri yer alır. Köynəklər Banişevskinin də həlledici rollardan birini oynadığı 1966-cı il mövsümündəki formanın əsasında “Kappa” tərəfindən “Neftçi” üçün eksklüziv hazırlanıb.

Formanın arxa boyun hissəsinə işlənmiş xüsusi detal – 8 və 0 rəqəmlərinin incə birləşməsi həm 80 illik yubileyi, həm də əbədiyyəti simvolizə edir. Bu, klubun şanlı keçmişinə ehtiramın rəmzi olmaqla yanaşı, Banişevskinin “Neftçi” tarixindəki əhəmiyyətini bir daha xatırladır.