AFFA-nın qabaqdangəlmişliyi

Son 2-3 gündə Azərbaycan futbolunda gündəmi “Qəbələ” Akademiyasının fəaliyyətini məhdudlaşdırması (reallıqda isə fəaliyyətini dayandırması) zəbt edib. “Bakı”nın ardınca “Qəbələ” akademiyasının da dağılması onsuz da oyunçu sarıdan əziyyət çəkən Azərbaycan futboluna böyük zərbədir.

Təsadüfi deyil ki, son iki gündə istər mətbuatda, istərsə də sosial şəbəkələrdə bu məsələ geniş müzakirə olunur. Əksəriyyət də “Qəbələ” Akademiyasının fəaliyyətini dayandırmasına görə AFFA-nı günahlandırır.

Bəli, assosiasiyanın hansısa klubun akademiyasını maliyyələşdirmək kimi bir öhdəliyi yoxdur. Lakin iki vacib məqam var. Birincisi, ölkədə futbola cavabdeh qurum AFFA-dırsa, deməli, assosiasiya ölkənin 1 nömrəli akademiyasına dayaq durmalıdır. İkincisi də, AFFA milyonlarla pul xərcləyib strategiyanı nə üçün yazdırıb? Azərbaycan futbolunun inkişafı üçün. Bu halda ölkədəki yeganə normal akademiyanın fəaliyyətini dayandırmasına necə göz yummaq olar?

Təəssüf ki, AFFA “Qəbələ” Akademiyasına yardım etmək əvəzinə qabaqdangəlmişliyə başlayıb. Əvvəla, assosiasiya əməkdaşlıq etdiyi bəzi mətbuat orqanlarından xahiş edib ki, “Qəbələ” məsələsində onları müdafiə etsin. İkincisi də, AFFA ötən mövsüm üçün “Qəbələ”yə ayrılan 700 mini, yaxud kluba məxsus stadionlarda keçirilən təlim-məşq toplanışları üçün ödənilən 265 mini gözə soxur. Halbuki AFFA-nın sözügedən 700 mini “Qəbələ”yə, necə, nə vaxt ödədiyini çoxları bilir. Mətbuatda bu barədə yazılar dərc olunmasaydı, məsələ ictimailəşməsəydi, bəlkə heç bu günə qədər pul ödənilməmişdi.

İkincisi də, camaata nə minnət qoyursunuz, guya milli komandalar başqa yerdə toplanış keçsəydi, bu, AFFA-ya öpüşə başa gələcəkdi? Yenə də pul ödəniləcəkdi də.

“Qəbələ” akademiyası ilə bağlı danışarkən AFFA-nın mətbuat katibi maraqlı bir məqama da toxunub: “Yeni mövsümdən Premyer Liqada iştirak üçün isə kluba 2,5 milyon manat ayrılacaq”. Qəribədir, AFFA İcraiyyə Komitəsi bu barədə hər hansı rəsmi açıqlama verməyib, qərar qəbul olunmayıb. Bu halda mətbuat katibi hansı əsasla 2.5 milyon məsələsini bu cür asanlıqla səsləndirə bilir?

Düzdür, son zamanlar bu mövsüm Premyer Liqa iştirakçılarına 3 milyon deyil, 2.5 milyon ödəniləcəyi barədə xəbərlər yayılıb. Lakin bu, rəsmi şəkildə açıqlanmayıb.

Əslində klublara ayrılan maliyyə yardımının yarım milyon azaldılması da AFFA-nın səriştəsizliyidir. Premyer Liqada klub sayını artırmaq, əslində isə icmaiyyətin gözündə özünü yaxşı göstərmək üçün tez-bazar I Liqadan 3 klub Premyer Liqaya buraxıldı. Halbuki “İmişli” və “Karvan”ın yüksək liqaya hazır olmadığı məlum idi. Təsadüfi deyil ki, çempionatın startına 40 gün qalıb, lakin “İmişli”nin harada oynayacağı, “Karvan”ın stadionunun hazır olub-olmayacağı bilinmir.

“İmişli” və “Karvan”a görə dövlətdən əlavə 6 milyon ala bilməyən AFFA hamam suyundan dost tutmaq üçün çıxış yolunu 10 klubun hər birindən yarım milyon kəsməkdə gördü. Bu günə qədər AFFA İcraiyyə Komitəsi bu haqda rəsmi qərarı açıqlamasa da, yarım milyonun kəsilməsi “Qəbələ”, “Şamaxı”, “Kəpəz” kimi klublara ciddi zərbədir. Elə bu hamam suyundan dost tutmağın ilk qurbanı da “Qəbələ” Akademiyası oldu. AFFA klubların yarım milyonunu kəsməsəydi, “Qəbələ” də həmin 500 minin necə deyərlər, üstünü düzəldib akademiyasını qoruyardı. Amma görünən odur ki, AFFA-ya akademiyalar yox, özünü icmaiyyətin gözündə yaxşı göstərmək maraqlıdır.

İBRAHİM