Elmar Baxşıyev: “Aris”in zəif və güclü tərəflərini öyrənmək üçün zamanımız var”

“Potensial rəqiblərimizin hamısı güclü komandalar idi. Ümumiyyətlə, avrokuboklarda zəif-güclü rəqib axtarmaq yersizdir. Həm də burada rəqibi biz deyil, püşk seçir”.

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Elmar Baxşıyev deyib.

UEFA Konfrans Liqasının II mərhələsinin püşkünü dəyərləndirən mütəxəssis klubun mətbuat xidmətinə açıqlamasında Yunanıstan “Aris”inə rəqib olmalarını belə dəyərləndirib:

“İndiki məqamda əsas işimiz komandanı tez bir zamanda komplektləşdirmək, təlim-məşq toplanışına tam heyətlə çıxmaq və oyunlara yaxşı hazırlaşmaqdır. Rəqibi hələ analiz etməmişik. Püşk indi atıldı. Onları analiz etmək, zəif və güclü tərəflərini öyrənmək üçün zamanımız var”.

Qeyd edək ki, “Araz-Naxçıvan”la “Aris” arasında oyunlar iyulun 24-də və 31-də keçiriləcək.