“Sabah”ın cahilliyi

İnanc Azərbaycanda xalq arasında sınama, yozum, yozma, inam adları ilə tanınan janr olub. Vikipediya deyir ki, professor Azad Nəbiyev inanclara belə tərif verib: “İnanclar sınamalar nəticəsində qətiləşən hökmlərin bədii ifadəsidir”.

Digər sahələrdə olduğu kimi, futbolda da müxtəlif inanclar mövcuddur. Bu baxımdan ilk yadıma düşən DÇ-1998-də Fransa millisinin müdafiəçisi Loran Blanın hər oyundan əvvəl qapıçı Fabyen Bartezin başından öpməsidir. İnsafən fransızların bu inancı özünü doğrultmuşdu.

Azərbaycanda isə ən çox yadda qalan təcrübəli mütəxəssis Əsgər Abdullayevin qəhvəyi rəngdəki gödəkçəsidir. Abdullayev fəsildən asılı olmayaraq, hər zaman vacib görüşlərə həmin gödəkçədə çıxırdı. Hətta azarkeşlər yarızarafat-yarıciddi deyirdilər ki, eyni gödəkçədən Əsgər müəllimdə 4-5 dənədir.

Adətən oxumuş, savadlı, dünya görüşü yüksək olan şəxslər bu cür inancları qəbul etmirlər. Bu baxımdan bu günlərdə eşitdiyim “Sabah”ın inancı məni şoka saldı. Məlum oldu ki, Masazır təmsilçisinin inanc aludəçiliyinin yanında Blanın öpüşü də, Abdullayevin gödəkçəsi də “toya getməlidir”.

Hər şey “Neftçi” ilə kubokun ilk yarımfinal oyunundan sonra başlayıb. Haşiyə çıxaraq qeyd edim ki, yaxın 1-2 ilə qədər deyirdilər “CBC Sport” AFFA-nın kanalıdır. Lakin indi kanalın statusu dəyişib. “CBC Sport” futbol dili ilə desək, olub İctimai Televiziyanın farm klubu. Vəziyyət o həddə çatıb ki, Azərbaycan Premyer Liqasının matçlarında şərhçilərin siyahısını oyunları yayımlayan “CBC Sport” yox, İTV müəyyənləşdirir...

Qayıdaq inanc məsələsinə. Deməli, kubokun ilk yarımfinal matçında qələbə qazanan “Sabah”dan göstəriş gəlib ki, cavab oyununda da “CBC Sport” eyni heyətlə iş başında olsun. İlk oyunda olduğu kimi, cavab görüşünü də Gündüz Abbaszadə şərh etsin, “miks-zona”da yenə də Aida Əliyeva olsun. Operatorlar dəyişməməlidir, montajçı, rejissor da eyni adamlar olmalıdır. Tapşırıq yerinə yetirilib, yenə iş başında həmin heyət olub... Gülməlidir, hə? Bunu ucqar bir kənd komandası etsəydi, bəlkə də haradasa başa düşmək olardı. “Sabah”a nə olub? Bəs “ruskiyazıçnılıq”, bəs intellekt, bəs dünya görüşü, bəs “Çto? Qde? Koqda?”, bəs elit azarkeşlər... Əslində bu “bəs”ləri də, cızma-qaranı da, “Sabah”ın cahilliyini də xeyli uzatmaq olardı. Amma görünən kəndə nə bələdçi? Və düşünəndə ki, bu adamlar minimum qarşıdakı 3 ildə Azərbaycan futboluna rəhbərlik edəcəklər, bizə yalnız bir cümlə demək qalır - vay futbolumuzun halına!

İBRAHİM