Elmar Baxşıyev: “Qarabağ” bizdən istəkli idi”

“Oyun barədə çox danışa bilməyəcəm. Çox zəif oynadıq. "Qarabağ" bizdən qat-qat üstün və istəkli idi. İki oyunumuz qalıb. Qarşıdakı günlərə daha düzgün yanaşıb, düzgün istiqamət verib, iki oyunu düşünməliyik”.

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Elmar Baxşıyev Azərbaycan Premyer Liqasının 34-cü turunda “Qarabağ”a 0:2 hesabı ilə uduzduqları oyundan sonra deyib.

Daha sonra mütəxəssis jurnalistlərin suallarını cavablandırıb:

- Ramon Maçadonu əvəzləməyiniz nə ilə əlaqədar idi?

- Maçado da bu oyun zəif oyunu göstərdi. Gələn oyunu da düşündük. Komanda olaraq zəif oynadıq. Onu da qəbul etmək lazımdır. Rəqib bizdən üstün idi.

- "Şamaxı" ilə oyunda üçüncü yeri rəsmiləşdirmək mümkün olacaq?

- Hər şey özümüzdən asılıdır. Çalışacağıq ki, komanda olaraq toparlanıb, istəyimizə çataq.

- Qələbəyə sizin daha çox ehtiyacınız var idi. Amma rəqib daha çox istəkli görünürdü. Səbəb nə idi?

- Belə olur. Səbəbi axtarsaq, dərinə gedəcəyik. Hər şey təsir edə bilər. Bir az rahatçılıq var idi. Onu da gizlətmək mümkün deyil. Dünənki oyunun nəticəsi də futbolçulara təsir etmişdi. Bu oyun bir silkələnmə olacaq və müsbət təsir edəcək.

- "Araz-Naxçıvan" növbəti mövsüm ev oyunlarını Naxçıvanda keçirə biləcək?

- Bilmirəm.