Vaqif Cavadov: "Hakim "Kəpəz"in qalib gəlməsi üçün hər şeyi etdi"

“Gərgin, maraqlı oyun oldu. Hər iki komanda qalib gəlmək istəyirdi. Bu gün hakim "Kəpəz"in qalib gəlməsi üçün hər şeyi etdi. Bizim də fürsətlərimiz oldu, dəyərləndirə bilmədik. Rəhbərlik hansı qərarı qəbul etsə, dəstəkləyəcəyəm. Növbəti mövsümdə burada qalsam, mənim işim barədə nəsə deyə bilərsiniz”.

Futbolxeber.az saytının məlumatına görə, bu sözləri “Sumqayıt”ın baş məşqçisi Vaqif Cavadov Azərbaycan Premyer Liqasının 34-cü turunda səfərdə “Kəpəz”ə 0:1 hesabı ilə uduzduqları oyundan sonra deyib.

Daha sonra o, jurnalistlərin suallarını cavablandırıb:

- Şansınız olsaydı, "Sumqayıt"da nəyi dəyişərdiniz?

- Əlbəttə ki, bəzi futbolçuları dəyişərdim. Müasir futbolda qaçmasan, istəkli olmasan, qalib gəlmək mümkün deyil. Mənim də səhvlərim var. Amma bu komandanı mən qurmamışam. Qışdan sonra cəmi 3 transfer etdik. Mənim getməyim "Sumqayıt"a fayda verərsə, getməyə hazıram.

- Gənclərə niyə şans vermirsiniz?

- 2006-2007 təvəllüdlü futbolçuları bizdən başqa hansı klub oynadır? Yetərli olsaydılar, əlbəttə, oynatmaq istəyərdim. 9-cu yerdə olmağımızın səbəbkarı yalnız Vaqif Cavadov deyil. Məndən əvvəl də komanda yaxşı oynamırdı. Hər situasiyaya hazıram. Əsas məsələ Premyer Liqada qalmaq idi, bunu da bacardıq. Həmişə Azərbaycan futbolunda legionerlərə üstünlük verilib. Əcnəbi pulları qatlayıb öz evinə gedir.

- Mətbuatın münasibətindən narazısınız?

- Bəziləri yazır ki, Vaqif getsin, əcnəbi məşqçi gəlsin. Aleksey Baqa gəlmişdi də. Azərbaycanlıları sevmirsinizsə, əcnəbilər gəlsin. Legioner limiti də ləğv olundu.

- Növbəti mövsümdə "Sumqayıt"da qalsanız, heyətin neçə faizini dəyişərdiniz?

- Yerli oyunçuların demək olar ki, 70 faizinin müqaviləsi başa çatır.

- Siz öz səhvlərinizi bilirsiniz?

- Səhvlərimiz çoxdur. Amma mənim səhvlərimi bilmək üçün gərək PRO kateqoriyasını oxuyasınız.

- Hakimlikdə konkret nədən narazı qaldınız?

- "Neftçi" ilə oyunda eyni epizodda bizə penalti verməmişdilər. Eyni situasiyada fərqli qərarlar verilir.