Samir Abasov: “Neftçi”nin futbolçusu olmaq hər şeydən üstündür”

"Neftçi" Azərbaycan Premyer Liqasının 34-cü turunda səfərdə "Turan Tovuz"u 2:1 hesabı ilə məğlub edib.

Futbolxeber.az saytının məlumatına görə, "ağ-qaralar"ın baş məşqçisi Samir Abasov matçdan sonra keçirilən mətbuat konfransında jurnalistlərin suallarını cavablandırıb:

- Turnirdə heç bir hədəfi olmayan komandaya motivasiya verib meydana çıxarmaq çətin deyil?

- Əlbəttə, çətindir. Onu da vurğula ki, oyunçularsızıq. Yəni nominal mərkəz müdafiəçisi, "altı nömrə" yoxdur. Bunları nəzərə alıb oyuna hazırlamaq çətindir. Amma bu çətinliklər rastımıza çox gəlib. Soyunub-geyinmə otağında ilk dediyimiz sözlər odur ki, rəqibin vəziyyəti bizim üçün önəmli deyil. Onlara xallar lazımdır, avrokuboklara oynayırlar. Bizə xallar lazım olanda heç kəsi rahat məğlub etməmişik. Ona görə də istəmirəm ki, bu rahatçılıq bizim üzərimizdə olsun. Bu gün "Turan Tovuz" oldu, sabah başqa komanda ilə oyuna girəndə atmosferi, təzyiqi görəcəyik. Futbolçulara demişəm ki, bu cür şeylərə baxmayın, öz formanıza baxın və oyununuzu göstərin. Çünki bizim tutduğumuz yerdən asılı olmayaraq, "Neftçi"nin futbolçusu olmaq bu hədəflərdən, atmosferdən, hər şeydən üstündür. Buna görə də oynamalıyıq.

- Növbəti mövsüm üçün azarkeşlərə açıqlanacaq planlarınız var?

- Növbəti mövsüm üçün artıq planlar var. Günlərlə, saatlarla, hər oyundan sonra bunlar danışılır, müzakirə olunur. Amma bu gün, əsasən də "Neftçi"nin azarkeşlərinə nəsə deməyə etiyac yoxdur. Çünki bu uşaqlar o qədər vədlər eşidib ki... Mənim dediklərim söz olaraq da qala bilər. Ona görə də, inşallah, biz istəklərimizi bu cür oyunlar və qələbələrlə göstərək ki, söz deməyə ehtiyac olmasın.

- Mövsümün əvvəlində "Neftçi"yə gəlsəydiniz, vəziyyət fərqli olardı?

- Kim bilir? Bəlkə, daha pis olardı. Amma yayda mənə təklif göndərilib, ya yox, bu haqda artıq danışmışam və təkrar demək istəmirəm. Keçmiş keçmişdə qaldı. Gələcəyə baxaq.

- Üç hücumçu buraxmışdınız və tez-tez yerlərini dəyişirdilər. Bu, nəyi göstərdi sizə?

- Onlar məcburiyyətdən deyil idi, plan üzrə elə buraxmışdıq. Həm də ucaboy oyunçuları meydanda saxlamaq istəyirdik. Çünki rəqibin oyun tərzini hər kəs yaxşı bilir. Yəni o mövqedə fərqli futbolçular olsaydılar da, planı belə cızmışdıq və eyni hücum xəttini buraxacaqdıq. Çox yaxşı oynadılar. Özləri rotasiya edirdilər. Çox effekt verdilər. Top itirmələri oldu, o da başadüşüləndir. Amma rəqibin müdafiəsinə çox təzyiq etdilər və hamısının qol epizodu oldu.

- Emin Mahmudovun formasını bir azarkeşə verdiniz. Bu, nə ilə bağlı idi?

- Oyun vaxtı bir azarkeş çağırdı. Elə bildim təhqir üçün çağırır. Dedim, gedim, nə olar, olar. Amma məndən şəhid övladına çatdırmaq üçün Emin Mahmudovun formasını istədi. Mən də getdim, gətirdim. Allah şəhidlərimizə rəhmət etsin.

- "Neftçi"də seleksiya üzrə məşqçilər qrupu yaradılması fikri var. Bu sizə nə qədər kömək edəcək?

- Bu, işimi çox asanlaşdırar. Deyərdim ki, o qrupumuz var. Amma bunu təkmilləşdirmək üçün ciddi addımlar atmalıyıq. Buraxdığımız səhvlər şahiddir. Bunu tək mən yox, klub olaraq istəyirik. Sağ olsunlar, mənə bu cür şərait yaradırlar.

- Aleks Fernandesdən razısınız?

- "Neftçi"yə gələn oyunçunun fərqi ondadır ki, həmən bir şey istəyirik ondan. Amma sonra fikirləşirəm ki, Aleks qışda qoşulub və elə də yaxşı vəziyyətimiz deyil idi. Bəzi oyunlarda məcbur oynamadığı mövqedə oynadırıq. Mən bu cür futbolçulara səbrli yanaşmağa məcburam. Çünki nəsə görüb transfer etmişik. Səviyyəsi və verdiyi qərarlar bəllidir. Sadəcə ümumi komanda ilə, ola bilər, ab-havanı hələ tam hiss etmir. Bu da düzələcək.

- "Neftçi"də işləmək böyük təzyiqdir. Bu təzyiqi hara yönlənidirirsiniz?

- Təzyiq var. Azarkeşi başa düşürəm, amma mətbuatda təzyiq sizdən gəlir. Etməsəniz, olmayacaq. Təzyiqi isə futbolçuların üzərinə yönlədirirəm, hara yönləndirəcəyəm? (gülür) Təzyiq həmişə olacaq. İşin bir hissəsidir. Öz işimizi görəcəyik.