Ayxan Quseynov: “Üçüncü yeri tutmaq üçün bu cür oyunlarda 3 xal qazanmalısan”

“Turan Tovuz”un yarımmüdafiəçisi Ayxan Quseynovun Futbolxeber.az saytına müsahibəsi

- Azərbaycan Premyer Liqasının 32-ci turunda “Şamaxı” ilə heç-heçə oynadınız (1:1). Xal itkisini nə ilə əlaqələndirmək olar?

- Qarşılaşma çətin alındı. “Şamaxı” yaxşı oyun göstərdi. Mövsümün axırıdır, elə bil gücümüz yox idi, özümüzü halsız hiss edirdik. Yenə də şanslarımız oldu, amma istifadə edə bilmədik. “Şamaxı” üçün 1:1 hesabı yaxşı nəticədir. Biz 100 faiz 2 xal itirdik.

- Nə baş verdi ki, hesabı açdıqdan dərhal sonra qapınızda qol gördünüz?

- Uşaqlarla həmişə öz aramızda danışırıq ki, çətinliklə qol vururuq. Buna görə də fərqləndikdən sonra soyuqqanlı olmalı, sadə oynamalıyıq. Yəni gördün çətin vəziyyətdəsənsə, topu sadəcə irəli vur, uzaqlaşdır. Təəssüf ki, yenə kobud səhv etdik, rəqib də bundan faydalandı.

- Bu xal itkisindən sonra üçüncü yerə ümidiniz qalıb?

- Çalışırıq üçüncü pilləyə yüksələk. Lakin təəssüf ki, səhvlərimiz “Araz-Naxçıvan”a çatmaq imkanı vermir. Üçüncü yeri tutmaq üçün bu cür oyunlarda 3 xal qazanmalısan, başqa yol yoxdur.

- “Şamaxı” iddialı deyil, əsas məqsədi Premyer Liqada qalmaqdır. Bu komandanı məğlub edə bilməyən “Turan Tovuz”ın avrokuboklara iddia etməsi nə dərəcədə realdır?

- Hiss olunurdu ki, “Şamaxı” bu matça yaxşı hazırlaşmışdı. Oyunu əks-hücumlar üzərində qurmuşdular. Onlar üçün hər şey yaxşı keçdi. O baxımdan ki, biz səhv etdik, onlar faydalandılar. Düzdür, bizim də qol epizodlarımız var idi. Lakin rəqib qapıçı 3-4 yaxşı seyv etdi. Haradasa konsentrasiyamız çatmadı. Yersiz çox xallar itirmişik.

- Qeyd etdiniz ki, “Şamaxı”nın matça yaxşı hazırlaşdığı hiss olunurdu. Sizcə, bu, Ayxan Abbasov amili ilə bağlıdır?

- Ayxan müəllimi tanıyırıq. Ola bilər onun üçün bu matçın motivasiyası daha yüksək idi. Lakin ümumilikdə hansı komandaya qarşı oynaması “Şamaxı” üçün fərq etmir. O, komandasını hər matça eyni cür, yüksək motivasiya ilə hazırlaşdırır.

- Qarşıdakı turda “Zirə” ilə qarşılaşacaqsınız. Həmin matçdan gözləntiləriniz nədir?

- Çətin olacaq. “Zirə” bu turda qələbə qazansa, məncə, mövsümü 100 faiz ikinci yerdə bitirəcək. Bu baş verərsə, artıq bizə qarşı rahat oynayacaqlar. Bu isə “Zirə” üçün üstünlükdür. Çünki futbolçu özünü rahat hiss edəndə daha yaxşı oynayır.

- Onda belə çıxır ki, “Kəpəz”lə görüşdə “Zirə”yə azarkeşlik edəcəksiniz? Çünki dediyiniz kimi olsa, onlar artıq növbəti turda bir qədər arxayın çıxa bilərlər...

- İnanmıram arxayın çıxsınlar. Rəşad Sadıqov komandasını hər oyuna ciddi hazırlaşdırır. “Zirə” bütün görüşlərə 3 xal üçün çıxır.

- “Araz-Naxçıvan” sabah “Səbail”i məğlub etsə, aranızdakı xal fərqi 7-ə çatacaq. Razılaşarsınız ki, 4 tur ərzində 7 xallıq fərqi aradan qaldırmaq qeyri-realdır. Belə çıxır ki, “Turan Tovuz”un avrokuboklara yollanması üçün bütün ümidi “Qarabağ”ın kuboku qazanmasınadır?

- Bəli, reallıq budur ki, kubokda “Qarabağ”a azarkeşlik etməliyik. Amma kuboku qazanmaq heç də asan olmayacaq. Düzdür, “Qarabağ” hər oyunun favoritidir. Lakin final bir matçdan ibarətdir və hər şey ola bilər. Görək necə olur. İnşallah kuboku “Qarabağ” qazanar.

Fərəc Aslanov, Tovuz