Ehtiram Quliyev: “Yaxın 3 ildə avrokuboklarda qrupa düşməyi hədəfləyirik”

“Bir çox klublar "Turan Tovuz"un Kürdəxanıdakı təlim-məşq bazasından faydalanacaq, bura onların istismarına veriləcək”.

Futbolxeber.az saytının məlumatına görə, bu sözləri adıçəkilən məkanın açılışından sonra jurnalistlərə açıqlamasında Tovuz klubunun İdarə Heyətinin sədri Ehtiram Quliyev deyib.

O, bu addımın klubun gələcəyi baxımından önəmli olduğunu söyləyib: "Bu, komandamızın nailiyyətləri üçün önəmli mərhələdir. İki meydan və otel kompleksi nəzərdə tutlub. Həmçinin bu ilin yayında Tovuzda meydançaların salınmasına başlayacağıq".

Klub rəhbəri Tovuz şəhər stadionunun örtüyünün daxili imkanlar hesabına dəyişdiriləcəyini vurğulayıb: "Tovuzdakı stadionun örtüyünü təbii edəcəyik. Bu, şəxsi vəsaitimiz hesabına olacaq. Dəstək üçün müraciət etmişdik. AFFA-nın görüləcək işləri çoxdur. Starteji planlar açıqlandıqdan sonra bizə heç nə deyilmədi. Ona görə də daxili imkanlar hesabına bu işi görəcəyik".

E.Quliyev Tovuz klubunun gələcəklə bağlı planları barədə danışıb: “Biz həmişə Tovuzdayıq. Komanda gedib-gəlir. Yayda meydançalar salınmağa başayacağıq. Azarkeşlər komandanı Tovuzda görəcəklər. Haqlı olaraq sual verə bilərsiniz ki, meydançanı niyə Tovuzda tikməmisiniz? Çünki Tovuzdakı əsas meydanın ot örtüyü sünidir. Bütün yaş qrupları orada məşq edir. Tovuzda bizə bir neçə meydança lazımdır. Yayda meydançaları mərhələli şəkildə salacağıq. Layihə tam bitdikdən sonra komanda yaxın illərdə tam olaraq Tovuzda məskunlaşacaq".

O, avrokuboklarda nailiyyətlər əldə etmək istədiklərini vurğulayıb: “Yaxın 3 ildə avrokuboklarda pley-off mərhələsinə qədər irəliləməyi, mümkünsə, qrupa düşməyi hədəfləyirik. Maddi-texniki bazamız o qədər geniş deyil. Tovuzdakı kompleksə və burada gördüyünüz bazaya çox böyük maddi vəsait xərclənib. Dayanıqlı inkişaf yolunu seçmişik. Hədəflərimizə doğru addım-addım irəliləyəcəyik”.