Karlos Jatoba: “Zirə” və “Sabah”ın uduzması bizim üçün ekstra motivasiya idi”

“Araz-Naxçıvan”ın yarımmüdafiəçisi Karlos Jatobanın Futbolxeber.az saytına müsahibəsi

- Azərbaycan Premyer Liqasının XXIX turunda “Sumqayıt”a qalib gəldiniz. Qazanılan 2:0 hesablı qələbəni necə şərh edərdiniz?

- Çətin oyun oldu. Matçdan əvvəl də uşaqlarla söhbətimiz zamanı demişdik ki, hər matç bizim üçün finala bərabərdir. Yaxşı oyun keçirdik. Ola bilər sona yaxın bir qədər geri çəkildik. Bu da anlaşılandır. “Qarabağ”la oyundan sonra komandada yorğunluq var idi. İstənilən halda vacib 3 xal götürdük.

- Matça çox fəal başladınız, qol vurdunuz, sonra VAR qolu ləğv etdi, ardınca penalti epizodu və yenə də VAR. Təxminən 7-8 dəqiqə oyunda fasilə yarandı. Bu cür halların çıxışınıza təsiri olur?

- Bəli, VAR üçün 2, 3, 4 dəqiqə oyun dayananda bu, bizə mənfi təsir edir. Çünki biz matça çox fəal başlamışdıq. Bu qədər fasilə isə oyunumuzun tempini aşağı salır. Penaltidən hesabı açdıq. Qoldan sonra da pressinq tətbiq edirdik. Rəqib ilk yarının ikinci hissəsini yaxşı keçirdi. Futbol təkcə hücum etməkdən ibarət deyil. Bəzən müdafiədə də oynamağı bacarmalısan. Biz də bunu bacardıq.

- Sizə qədər avrokuboklara vəsiqə uğrunda rəqiblərinizdən bu tur “Zirə” və “Sabah” uduzmuşdu, “Turan Tovuz” isə 2 xal itirmişdi. Bütün bunlar sizə əlavə motivasiya verir?  

- Əlbəttə. Bilirdik ki, “Zirə” və “Sabah” uduzub, “Turan Tovuz” isə heç-heçə edib. Rəqiblərimizin xal itirməsi bizim üçün ekstra motivasiya idi.

- Uzun müddət yaşıl meydanlardan kənarda qaldığınızı nəzərə alsaq, hazırda çıxışınızdan nə dərəcədə razısınız?

- Əvvəlki ilə müqayisədə indi özümü fiziki baxımdan daha yaxşı hiss edirəm. Uzun müddət meydana çıxmadım. Ona görə də oyun ritminə tam düşməliyəm. Bəzən elə toplar itirirəm ki... Normalda həmin topları itirməməliyəm. Bütün gücümlə məşqlədə işləyirəm, əlimdən gələnin ən yaxşısını etməyə çalışıram.

- Qarşıdan “Araz-Naxçıvan”ı “Kəpəz”lə çempionat oyunu gözləyir. Fikriniz daha çox həmin matçdadır, yoxsa kubokda?

- Kuboka hələ var. “Qarabağ”la cavab matçını yalnız oyuna bir neçə gün qalmış fikirləşəcəyik. Hazırda bütün fikrimiz çempionata yönəlib. Bilirik ki, “Kəpəz”lə görüş çətin keçəcək. Hər şeyin ən yaxşısını etməliyik ki, 3 xal qazanaq.

- Hər nə qədər hazırda o barədə düşünməsəniz də, fikirləriniz maraqlıdır. Komandanızın finala yüksəlmək şansını necə dəyərləndirirsiniz?

- Yaxşı şansımız var. Lakin hamımız bilirik ki, “Qarabağ” çox güclü rəqibdir. Meydana elə çıxmalıyıq ki, sanki hesab 0:0-dır. İlk oyunda olduğu kimi vuruşmalıyıq. Yalnız bu halda istəyimizə çata bilərik.

İbrahim Cəfərov