Qurban Qurbanov: “Biz də insanıq, ömür boyu sakit ola bilmərik”

“Araz-Naxçıvan”ı təbrik edirəm. Çox vuruşdular, qalib gəlmək üçün hər şey etdilər. Qarşıda cavab oyunu var. Matç haqda çox danışılası bir şey yoxdur. Elə də keyfiyyətli oyun olmadı. Kubok matçları hər zaman çempionat oyunlarından fərqlənib. Cavab görüşünə hazırlaşacağıq. Hələ xeyli vaxtımız var”.

Futbolxeber.az saytının məlumatına görə, bu sözləri “Qarabağ”ın baş məşqçisi Qurban Qurbanov Azərbaycan kubokunun yarımfinal mərhələsinin ilk matçında “Araz-Naxçıvan”a 0:1 hesabı ilə uduzduqları oyundan sonra deyib.

Daha sonra o, jurnalistlərin suallarını cavablandırıb:

- Avrokubok oyunlarında "Qarabağ"a qarşı yanlış qərarlar verilib. Amma heç vaxt bu qədər aqressiv olmamısınız. Belə fikir yaranır ki, Qurban Qurbanov sanki yerli komandalara məğlub olmağı bacarmır...

- Yox, niyə ki? Dəfələrlə məğlub olmuşam və özümü normal aparmışam. İnsanıq da, aqressiya olur. Ola bilər ki, epizod penalti idi. Deyirlər ki, penalti kosmosdan görünməlidir. Mən də istəyirəm ki, oyun daha sürətli, dinamik getsin. Oyunda pauza həddindən çox oldu. Hakim də öz ritmini itirir. Yerli komandalara məğlubiyyəti qəbul etməməyimlə bağlı fikirlə razılaşmıram. Əksinə, çox istəyərəm ki, hər komanda "Qarabağ"a qalib gəlsin və o klubun rəhbərliyində futbola sevgi daha da çox olsun, maraq böyüsün. Biz də insanıq, ömür boyu sakit ola bilmərik.

- Penalti epizodunu necə şərh edərdiniz?

- Planşetə penalti epizoduna görə vurdum. Onu da gördünüz, gözdən qaçırmadınız.