Qara Qarayev: “Limitin ləğvindən sonra millidən uğur gözləmək sadəlövhlükdür”

“Araz-Naxçıvan”ın yarımmüdafiəçisi Qara Qarayevin Futbolxeber.az saytına müsahibəsi

- Azərbaycan Premyer Liqasının 28-ci turunda “Neftçi” ilə heç-heçə etdiniz (1:1). Qələbə qazanmağınız üçün nə çatışmadı?

- Həm “Neftçi”, həm də biz qol epizodları yarada bildik. Bəlkə də qalibiyyət bizə daha çox şey verərdi. Lakin hazırda heyətlə bağlı bəzi problemlərimiz var. Onlar aradan qalxandan sonra daha yaxşı nəticələr əldə edəcəyik.

- 6-cı dəqiqədə artıq hesab 1:1 idi və o cür başlanğıcdan sonra hər kəs bol qollu bir matç gözləyirdi...

- 1:1-dən sonra da şanslarımız oldu. Bəlkə də ikinci qolu vura bilsəydik, oyunun məcrası dəyişəcəkdi. Təəssüf ki, alınmadı. Ümumilikdə yaxşı oyun oldu.

- “Turan Tovuz”un bir gün əvvəl uduzduğunu nəzərə alsaq, deyə bilərik ki, “Neftçi” ilə matç da 1 xal da “Araz-Naxçıvan” üçün qazanc oldu?

- Bəli, elədir. Qalib gələ bilmədik. Amma heç-heçə sayəsində dördüncü yerlə aramızda xal fərqini artırdıq.

- “Neftçi”nin müdafiəçisi Yuri Matias oyundan sonra qeyd etdi ki, ikinci hissədə “Araz-Naxçıvan” nə özü oynadı, nə bizə oynamağa imkan verdi. Razısınız bu fikirlə?

- Hər futbolçunun bir baxışı var. Düşünümürəm ki, elədir. Biz ikinci qolu vurmaq, qalib gəlmək istəyirdik. Bəlkə də təzyiqi artırsaydıq, daha yaxşı nəticə əldə edərdik.

- Qarşıdan kubok gəlir. “Qarabağ”a qarşı keçiriləcək yarımfinalın ilk matçından gözləntiləriniz nədir?

- Hər oyuna ciddi yanaşmalıyıq. Artıq bu gündən kubok matçına hazırlaşacağıq. Hər oyun vacibdir. Elmar müəllim kubokda uğur qazanan məşqçidir. Bizi yaxşı hazırlaşdıra biləcək. Rəqib barədə də deyiləcək söz yoxdur. “Qarabağ”ın gücü hamıya məlumdur. Məncə, qrafikin sıx olması bizə problem yaradacaq, “Qarabağ”a yox. İstənilən halda işimiz budur, çətinliklərin öhdəsindən gəlməliyik.

- “Araz Naxçıvan”ın hər iki cəbhədə sona qədər vuruşmağa gücü çatacaq?

- Əlbəttə. Elə bir komanda tanımıram ki, desin kubok mənə lazım deyil.

- Son matçlarda “Araz-Naxçıvan”ın oyunlarında tez-tez gərginlik yanaşır. Bu, komandanın istənilən nəticələri qazana bilməməsi ilə bağlıdır?

- Əvvəlki dövrələrdə rəqibləri məğlub etməyimiz onlarda aqressiya yaradıb. Artıq dördüncü dövrədi deyə vəziyyəti dəyişmək istəyirlər. Digər tərəfdən də aqresissya olmasa, uğur qazanmaq mümkün deyil. Topa, rəqibə qarşı mütləq aqressiya olmalıdır.

- Yəqin ki, millinin Haiti və Belarusla yoxlama oyunlarını izləmisiniz. Fikirləriniz necədir?

- Millinin oyunçuları barədə heç nə deməyəcəyəm. Hər zaman onlara dəstəyəm və dəstək də olacağam. Çünki onlar dəstəyə layiqdirlər. Biz problemi meydançada görürüksə, tamam, futbolçuların hamısını tənqid etmək lazımdır. Lakin bizdə futbolçu yetişmirsə, bir mövqeyə 3-4 futbolçu çağıra bilmiriksə, deməli, problem meydandan kənardadır. Oyunçu yetişdirə bilmirik, fərqli şeylərə diqqət yetirməliyik. Bu gün biz məşq etməyə meydança tapa bilmirik. Stadion problemi yaşayırıq. Amma deyirik ki, sabah Fransaya qarşı heyət düzəltməliyik. Bu, nə dərəcədə mümkündür? Vəziyyət dəyişmirsə, şərait yoxdursa, heç bir məhsul götürə bilməyəcəyik. Çətin periodda futbolçularımıza sahib çıxmalıyıq. Demirəm yaxşı oynayırlar. Biz də vaxtı ilə uduzmuşuq. İdmançılarımızı tənqid edib dəstəkləməliyik. Həm sevgi, həm qorxu olmalıdır ki, işlərinə məsuliyyəti yanaşsınlar. Bəlkə bir qədər boşluqdu deyə yaxşı hazırlaşmırlar. Lakin bu, azarkeş qarşısında səbəb deyil. İstər “Araz-Naxçıvan”da, istər millidə hamı bizdən nəticə gözləyir. Uğursuz nəticədən sonra evə gedəndə valideynlərimiz belə bizdən narazı qalıblar. Elə olub ki, uduzduğumuz oyundan sonra atam mənimlə danışmaq istəməyib. Onların da həyatı bizdən seçilmir.

- “Araz-Naxçıvan” üçüncü pillədə qərarlaşsa da, komandanızdan heç kim milliyə dəvət almadı...

- Məncə, ən layiqli namizəd Urfan Abbasov idi. Düşünürəm ki, onu yığmaya çağırmaq olardı. Yaxşı da kömək edərdi. Eləcə də Slaviki.

- Sizin də milliyə dəvət alacağınızı gözləyənlər çox idi. Bəs Qara Qarayev özü millidən dəvət gözləyirdi?

- Bir ara zədələndim, bir qədər kənarda qaldım. Ola bilər bu məqam məşqçilərin fikrini dəyişdi. Çox istəyirəm ki, milli komandada daha 1-2 oyun keçirim və milli ilə vidalaşım.

- Hər halda yay toplanışı zamanı – Latviya və Macarıstanla oyunlarda bunu reallaşdırmaq mümkündür.

- Bəlkə yay toplanışına qədər gözlədim. Sonra millidəki karyeramla bağlı qərar verəcəm. İstənilən halda getsəm də, getməsəm də, ürəyimiz hər zaman milli üçün, bayraq üçün döyünüb, hər zaman da belə olacaq.

- Premyer Liqada legioner limitinin ləğvinə münasibətiniz necədir?

- Baxır hansı prizmadan soruşursunuz. Məsələn, AFFA tərəfdən tam haqlı qərardır, yerli futbolçular prizmasından tam haqsızdır. Media tərəfdən elədir ki, jurnalistlərin yarısı dəstəkləyir bu qərarı, yarısı yox. İstənilən halda zaman lazımdır. Belə görünür ki, milli komandanı artıq gözdən çıxarmışıq. Legionet limitinin ləğvindən sonra millidən hər hansı uğur gözləyiriksə, bu, sadəlövhlükdür. Gözləməməliyik. Biz futbolçu yetişdirməliyik. Yetişdirmək üçün heç bir mexanizmi işə salmadıqsa, biz millidən nə gözləyək? Sırf çempionat baxımından da dəqiq nəsə demək çətindir. Bəlkə gələn mövsüm daha yaxşı alındı, bəlkə də pis. Bu vaxta qədər Azərbaycana elə legionerlər gətiriblər ki, heç dövlət müəssisəsinə işə götürmərsən. Amma onlar gətiriblər, heyətə daxil edə biliblər. Əsas sual odur ki, bu mexanizmə kim nəzarət edəcək? Düşünürüksə ki, limitin ləğvi hər şeyin üzərindən xətt çəkəcək, biz fantastik nəticələr əldə edəcəyik, xeyr, elə deyil. Legioner limitinin ləğvi Qaraların, Urfanların, Vadimlərin inkişafının qarşısını alacaq. Sonra ayılacağıq ki, bizdə futbolçu yoxdur və yenidən başlayacağıq. Yenə də 5-10 il vaxt lazım olacaq, yenə kimisə xərcləyəyik, kiminsə üstünə gedəcəyik. Kim oynayırsa, onları tənqid edəcəyik. Soyuq başla fikirləşmək lazımdır.

İbrahim Cəfərov