Yankoviç Panenko zərbəsi haqda: “Həmin anda heç bir qapıçı...”

“Neftçi”yə qarşı oyunlarımız həmişə çətin keçir. Budəfəki qarşılaşma da istisna olmadı”.

Futbolxeber.az saytına açıqlamasında bu sözləri “Qarabağ”ın yarımmüdafiəçisi Marko Yankoviç deyib.

Azərbaycan Premyer Liqasının 23-cü turunda “Neftçi”ni 1:0 hesabı ilə məğlub etdikləri görüş barədə danışan monteneqrolu futbolçu qeyd edib ki, azlıqda qaldıqdan sonra taktiki dəyişikliklər ediblər: “Bizim üçün vacib matç idi. Çempionatdakı hər görüşə 3 xal üçün çıxırıq. Bu dəfə də məqsədimiz qələbə qazanmaq idi. Oyunun əvvəlində qırmızı vərəqə aldıq. Azlıqda qaldıqdan sonra taktikanı dəyişdik. Maraqlı və gərgin oyun keçdi. Çox şadam ki qələbə qazandıq”.

Matçdakı yeganə qolun müəllifi olan Yankoviç 89-cu dəqiqədə penaltidən fərqləndiyi epizodda Panenka zərbəsi yerinə yetirdi. O, riskli addımının səbəbini belə izah edib: “Bəli, risk etdim. Amma düşündüm ki, bu cür oyunda və son dəqiqələrdə heç bir qapıçı rəqibdən Panenka zərbəsi gözləməz. Məhz buna görə də həmin anda zərbəni elə yerinə yetirdim”.

30 yaşlı futbolçu “Neftçi Arena”dakı ab-havadan da söz açıb: “Atmosferdə əla idi. Çox istərdik ki, hər matçda bu cür ajiotaj olsun”.

İbrahim Cəfərov