“Aleks “Neftçi”də təkmilləşsə, onu geri qaytaracağıq”

"Baltika"nın baş direktoru Ravil İzmailov futbolçusu  Aleks Fernandesi "Neftçi"yə icarəyə verməklərindən danışıb.

Futbolxeber.az saytının “Metaratings”ə istinadən verdiyi məlumata görə, “ağ-qaralar” 22 yaşlı vingerlə cari mövsümün sonunadək müqavilə imzalayıb.

"Baltika"nın baş direktoru isə bu keçidə belə münasibət bildirib: "Alekslə yollarımızı ayırmamışıq, sadəcə onu icarəyə vermişik. Əgər Aleks təkmilləşib daha güclü geri qayıtsa, baş məşqçi Andrey Viktoroviç onu yenidən komandaya qəbul edəcək. Yoxsa, bir yol tapacağıq. Hesab edirəm ki, bu, bu günə qədər verilmiş ən yaxşı və düzgün qərar idi".

Qeyd edək ki, Aleks Braziliyanın “Atletiko Mineyro” və “Santos” klublarının U-20 komandalarında çıxış edib, 2022-ci ildə isə Bolqarıstan “Çerno More”sinə keçib. 2024-cü ilin fevralından şərəfini qoruduğu “Baltika”nın heyətində Rusiya birinci liqasında bu mövsüm meydana çıxdığı 15 oyunda 3 qola imza atıb.