Cavid Hüseynov: “60-65 dəqiqə çox yaxşı futbol oynadıq”

“İki dəfə dalbadal "Qarabağ"la qarşılaşdıq. Üç gün sonra bu rəqibə qarşı oynamaq bizim kimi komanda üçün çətindir. 60-65 dəqiqə çox yaxşı futbol oynadıq”.

Futbolxeber.az saytının məlumatına görə, bu sözləri "Səbail”in baş məşqçisi Cavid Hüseynov Azərbaycan Premyer Liqasının XXII turunda “Qarabağ”a 0:5 hesabı ilə uduzduqları oyundan sonra deyib.

O, komandasının heyətinin kasad olduğunu bildirib: “Dünənki məşqdə 15 futbolçu iştirak edib. Zədəlilərimiz var. Geniş heyətimizin olmamasının təsiri oldu ki, gücümüzü 90 dəqiqəyə çatdıra bilmədik. Bir neçə gün öncə kubok matçı olmasaydı, bu gün 90 dəqiqə yaxşı mübarizə görə bilərdik”.

C.Hüseynov zədəli futbolçuların durumuna belə aydınlıq gətirib: “Qorka Laruçça xəstələnib. Dünən halı yaxşı deyildi. Marko Nikoliç iki oyundur bizə kömək edə bilmir. Fərid Nəbiyev dünən zədələnib”.