Əyyub Allaş: “Araz-Naxçıvan” bəxt sayəsində ikinci yerdə deyil”

“Araz-Naxçıvan”ın yeni transferi Əyyub Allaşın Futbolxeber.az saytına müsahibəsi

- “Kəpəz”lə oyunda “Araz-Naxçıvan”ın heyətində debüt etdiniz. İlk matçınızda komandanın xal itkisi ilə üzləşməsini necə qarşıladınız?

- Oyun bir qədər istədiyimiz kimi alınmadı. Qol şansları elə də çox deyildi. Düzdür, komanda olaraq fərqlənmək üçün çox çalışdıq. Təəssüf ki, rəqib qapısına yol tapmaq mümkün olmadı. İnanıram ki, gələn oyunlarda daha yaxşı nəticələr qazanacağıq.

- Yenidən Azərbaycana qayıtdınız. Təəssüratlarınız necədir?

- Burada olduğum üçün xoşbəxtəm. Yenidən Azərbaycanda forma geyəcəm. Bu, məni sevindirir.

- “Şerif”ə böyük ümidlərlə yollansanız da, 6 aydan sonra klubdan ayrıldınız. Buna səbəb nə oldu?

- “Şerif”ə yollanarkən xoşbəxt idim. Lakin həyatda hər şey planlaşdırdığımız kimi getmir. Sonradan müəyyən dəyişikliklər oldu. Buna görə də klubdan ayrılmalı oldum.

- “Şerif”in heyətində 5 matçda start heyətində yer almışdınız. Bunu nə ilə əlaqələndirmək olar?

- Bu, futbolla bağlı problem deyildi. Klubda rəhbər postda dəyişiklik oldu. Bu məqam klubdakı karyerama təsir etdi. Yəni məsələ futbolda deyil. Yeni direktor gəldi. Ümumiyyətlə, “Şerif” bir qədər qəliz klubdur. Hər fasilədə xeyli sayda futbolçu gəlir, xeyli sayda da oyunçu komandadan ayrılır.

- “Turan Tovuz”un da sizin xidmətinizdə maraqlı olduğu deyilirdi...

- Ola da bilər, olmaya da (gülür). Çünki bu işlərlə menecerim məşğul olur. Ona görə də dəqiq fikir bildirməkdə çətinlik çəkirəm.  

- Başqa təkliflər var idi?

- İndi bu barədə nəsə demək artıqdır. Çünki artıq “Araz-Naxçıvan”dayam. Azərbaycanda oynamaq istədim. Burada hər şey məni qane edir. Ailəm də Bakıda yaşamaqdam məmnundur. Bura bizim üçün çox rahatdır. Azərbaycan müsəlman ölkəsidir, buna görə də bizi hər şeyi razı salır.

- “Araz-Naxçıvan”ın yarımmüdafiə xəttində çox ciddi rəqabət var. Bu məqam sizi narahat etmir?

- Rəqabət komandanı gücləndirir. Bu, müsbət haldır. Heç bir problem yoxdur. Məqsədim “Araz-Naxçıvan”a kömək etməkdir. Bunun üçün də əlimdən gələni edəcəyəm.

- Komandanın avrokuboklar şansını necə dəyərləndirirsiniz?

- Baş məşqçi Elmar Baxşıyevi yaxşı tanıyıram. Onun oyun tərzinə, məşq sisteminə bələdəm. Təbii ki, seçimimdə onun böyük rolu oldu. Digər tərəfdən də Azərbaycan çempionatını izləyirdim. Komandanın çıxışından, nəticələrdən məlumatlı idi. Bəlkə də çoxları üçün “Araz-Naxçıvan”ın turnir cədvəlindəki mövqeyi sürpriz ola bilər. Amma mənim üçün belə deyil. “Araz-Naxçıvan” bəxt sayəsində ikinci yerdə deyil. Komanda baxımlı futbol oynayır. Düşünürəm ki, bütün bunların yekununda avrokuboklara vəsiqə qazanmaq mümkündür. Mən də bu yolda komandaya əlimdən gələn köməyi edəcəm. Necə alınacağını zaman göstərəcək. İnanıram ki, qarşıya qoyulan hədəfə çatacağıq.

İbrahim Cəfərov