Bernardo Dias: “Maçadonun zədəsinə yox, bundan sonrasına köklənməliyik”

“Araz-Naxçıvan”ın yarımmüdafiəçisi Bernardo Diasın Futbolxeber.az saytına müsahibəsi

- Azərbaycan kubokunun 1/4 final mərhələsinin ilk oyununda “Zirə”ni məğlub etdiniz. 1:0 hesablı qələbəni necə şərh edərdiniz?

- Matça yaxşı başladıq. Təzyiq edirdik. “Zirə” isə qeyri-adi heç nə ilə yadda qalmadı. Fasilədən sonra müəyyən şeyləri düzəltməyə çalışdıq. Qol vurmaq üçün şanslarımız oldu. Bu qələbəyə layiq idik.

- Vurduğunuz yeganə qol matçın taleyini həll etdi...

- Yaxşı oynadıq. Qol vurmaq üçün çox şansımız oldu. Mənim də məqsədim komandaya kömək etməkdir. Qələbədə pay sahibi olmaq üçün əlimdən gələni edirəm.

- Cavab oyunu öncəsi şansları necə dəyərləndirirsiniz?

- “Zirə” yaxşı komandadır. Oyunumuzdakı bəzi çatışmazlıqları yaxşılaşdırmalıyıq. İkinci görüşdə hesabı qorumaq yox, qələbə qazanmaq barədə düşünməliyik. Məqsədimiz səfərdə də qalib gəlməkdir.

- “Araz-Naxçıvan” üçün Avropa yolunda əsas hədəf kubokdur, yoxsa çempionat?

- Hazırda əsas fikrimiz “Kəpəz”lə oyundadır. Həmin matçda 3 xalı qazanmalıyıq ki, turnir cədvəlindəki yerimizi qoruyaq. Məqsədimiz avrokuboka vəsiqə qazanmaqdır, fərqi yoxdur çempionatdan, yoxsa kubokdan. Addım-addım irəliləyirik.

- Komandanızın əsas hücumçusu Ramon Maçado zədələndi. Onun yoxluğu “Araz-Naxçıvan”ın çıxışına necə təsir edəcək?

- Ciddi problem yaşayacağımızı düşünmürəm. Düzdür, Maçado komandamız üçün vacib futbolçudur. Lakin heyətimizdə kifayət qədər bacarıqlı oyunçular var. Onun yoxluğunu unutduracaqlar. Düşünürəm ki, Maçadonun zədəsinə yox, bundan sonrasına köklənməliyik.

Fərəc Aslanov