Sergey Samok: “Turan Tovuz” daha yuxarı pillələrə layiqdir”

“Turan Tovuz”un qapıçısı Sergey Samokun Futbolxeber.az saytına müsahibəsi

- “Qarabağ” üzərində qazanılan 2:1 hesablı qələbəni necə şərh edərdiniz?

- Oyuna yaxşı start vermədik. Komandamızın heyətində 2 debütant var idi. Biryerdə oyun təcrübəmizin olmadığı ilk dəqiqələrdə hiss edilirdi. Həmçinin daha iki futbolçu yeni mövqedə çıxış edirdi. Bütün bunlar matça istədiyimiz kimi start verməyimizə mane oldu. Lakin zamanla vəziyyəti dəyişə bildik. Daha çox pressinq etməyə, topla oynamağa başladıq və yekunda da bütün bunlar öz bəhrəsini verdi.

- 3 oyunda “Turan Tovuz” “Qarabağ”dan 7 xal alıb. Bu nəticəni sensasiya hesab etmək olar?

- Əlbəttə, “Qarabağ” güclü komandadır. Bilirəm ki, illərdir Avropada Azərbaycanı layiqincə təmsil edir. Lakin biz də zəif deyilik. Düşünürəm ki, bunu da sübuta yetiririk.

- Yəqin ki, əvvəlki turda İvan Konovalov qapısında 5 qol gördüyündən “Qarabağ”la matçda start heyətində yer alacağınızı gözləyirdiniz...

- Bu, məşqçilər korpusunun qərarı idi. Mən meydana çıxmağa hər zaman hazıram. Düşünürəm ki, matçı pis keçirmədim və vəzifəmin öhdəsindən gəldim.

- Necə düşünürsünüz, bu qələbə əsas heyətin daimi üzvünə çevrilməyinizə kömək olacaq?

- Bu barədə qərarı mən qəbul etmirəm. Yekun söz məşqçilərə məxsusdur. Dediyim kimi, mən hər zaman meydana çıxmağa hazıram.

- Sizin “Qarabağ” üzərində qələbə qazanmağınızla ilk üçlük, xüsusən də 2 və 3-cü yer uğrunda mübarizə yenidən qızışdı. “Turan Tovuz”un potensialı avrokuboklara yollanmağa imkan verir?

- Əlimizdən gələni edirik. Hazırda dördüncü yerdəyik. Amma “Turan Tovuz” daha yuxarı pillələrə layiqdir. Qarşımıza konkret hədəf qoyulub. Ümid edirəm ki, istəyimizə çatacağıq və hazırkı mövqeyimizi daha da yaxşılaşdıracağıq.

- Növbəti turda “Səbail”lə qarşılaşacaqsınız. Həmin matçdan gözləntiləriniz nədir?

- “Səbail”lə buna qədər 2 dəfə qarşılaşmışıq. Hər iki görüş də çox çətin keçib. Onlar Premyer Liqada qalmaq uğrunda mübarizə aparsalar da, asan təlis olmurlar. Düşünürəm ki, qarşıdakı matç da istisna təşkil etməyəcək. Sona qədər təzyiq göstərəcəklər.

- Bir tur əvvəl “Kəpəz”dən 5 qol buraxan “Turan Tovuz” səfərdə “Qarabağ”a qalib gəlir, sonuncu pillədəki “Səbail” isə Gəncə klubunu məğlub edir. Bütün bunları nəzərə alaraq Azərbaycan çempionatının səviyyəsini necə qiymətləndirirsiniz?

- Çempionatın səviyyəsi çox yaxşıdır. Hər komanda digərini məğlub edə bilər. “Qarabağ” istisna olmaqla, digər komandaların səviyyələri demək olar ki, bərabərdir. Məhz bu səbəbdən də istənilən komandanın digərini məğlub etməsi normal qarşılanır.

Fərəc Aslanov