Momo Yansane: “Sumqayıt”ın uğurlarında pay sahibi olmaq istəyirəm”

“Yaxşı oyun alındı. Qalib gəlmək istəyirdik. Meydana 3 xal üçün çıxmışdıq. Lakin yekunda heç-heçə ilə kifayətləndik”.

Futbolxeber.az saytına müsahibəsində bu sözləri “Sumqayıt”ın yeni transferi Momo Yansane Azərbaycan Premyer Liqasının XX turunda “Sabah”a qarşı keçirdikləri oyun barədə danışarkən deyib.

Qvineyalı forvard nəticəni (0:0) qənaətbəxş sayır: “Taktiki cəhətdən yaxşı oynadıq. Baş məşqçimizin tapşırıqlarını yerinə yetirdik. Düşünürəm ki, səfərdə 1 xal heç də pis nəticə deyil. Artıq növbəti matçlarda qələbə qazanacağımıza inanıram”.

“Sumqayıt”a bu günlərdə qoşulan 27 yaşlı futbolçu yeni klubundakı debütunu belə şərh edib: “Yeni komandamda tez bir zamanda debüt etdiyim üçün şadam. Bir qədər vaxta ehtiyacım var. Düşünürəm ki, qarşıdakı matçlarda özümü göstərmək üçün daha çox şans qazanacağam. Əlimdən gələni edəcəm ki, etimadı doğruldum”.

Momo Yansane “Sumqayıt”a keçidinin alındığı üçün şad olduğunu bildirib: “Emosiyalarım  yaxşıdır. Burada olmaqdan məmnunam. “Torpedo Kutaisi”dən ayrıldıqdan sonra bir neçə variant olsa da, seçmimim “Sumqayıt”dan yana oldu. Burada məni çox yaxşı qarşıladılar. İstər rəhbərlik, istər baş  məşqçi, istərsə də komanda yoldaşlarım. İlk gündən hiss edirəm ki, “Sumqayıt”da çox gözəl atmosfer var. Bu da məni tam qane edir”.

Təcrübəli hücumçu “Sumqayıt”dakı hədəflərindən də söz açıb: “Məqsədim qollar vuraraq “Sumqayıt”ın qələbələrində pay sahibi olmaqdır. Bu günə qədər bir çox ölkələrdə çıxış etmişəm. Təcrübəmlə “Sumqayıt”ın uğurlarında pay sahibi olmaq istəyirəm. İndidən neçə qol vuracağını deyə bilmərəm. Lakin əlimdən gələni edəcəm ki, azarkeşləri tez-tez sevindirə bilim”.

Fərəc Aslanov