Kurban Berdıyev: “Bu cür yaxşı məşqçinin zəif nöqtəsi az olur”

“Evdəki ağır məğlubiyyətdən sonra bu gün var gücləri ilə mübarizə apardıqlarına görə uşaqlara təşəkkür edirəm. Bütün detallarda uduzduqları məqamda belə inamla, ümidlə oynayırdılar. Əlimizə belə imkanlar düşdü və biz bunlardan yararlandıq”.

Futbolxeber.az saytının məlumatına görə, bu sözləri “Turan Tovuz”un baş məşqçisi Kurban Berdıyev Azərbaycan Premyer Liqasının XX turunda səfərdə “Qarabağ”ı 2:1 hesabı ilə məğlub etdikləri oyundan sonra deyib.

O, "Kəpəz"lə oyundan sonra nəyi dəyişdiniz?” sualını belə cavablandırıb: “Çətin sualdır. Futbolçuların hər biri ilə fərdi şəkildə danışmaq lazım gəldi. Onlara bildirdim ki, yanaşmanı dəyişmək lazımdır. İnanıram ki, "Kəpəz"lə oyundakı məğlubiyyət bir daha təkrarlanmayacaq”.

Təcrübəli mütəxəssis "Kəpəz"lə matçın ən pis oyunları olduğunu söyləyib. O, standart vəziyyətlər üzərində xüsusi çalışdıqlarını vurğulayıb: “Biz istər müdafiə planında, istər hücumda, hər zaman standart vəziyyətlərin üzərində işləyirik. Təəssüflər olsun ki, ötən matçda standart vəziyyətlərə ciddi yanaşmadıq”.

Berdıyev Veysəl Rzayevin sol cinah müdafiəçisi kimi performansını müsbət dəyərləndirib: “Bu gün Veysəl çox yaxşı oynadı. Bilirik ki, o, akademiyada həm sağ, həm də sol cinah müdafiəçisi kimi oynayıb. Bu, onun üçün yenilik deyildi. Həmçinin Rəhim Sadıxovu qeyd edərdim. Komandada belə oyunçular var. Veysəl Rzayev də onlardan biridir”.

“Turan Tovuz”un baş məşqçisi penalti gözlədikləri epizoda da toxunub: “Mən adətən hakimlər haqda danışmıram. Mənim olduğum uzaq mövqedən penaltiyə oxşayırdı. Təkrara baxmamışam. Dəqiq nəsə deyə bilmərəm”.

“Qurban Qurbanovun zəif nöqtəsini tapdığınızı demək olar?” sualına cavabında Kurban Berdıyev deyib: “Bu cür yaxşı məşqçinin zəif nöqtəsi az olur. Sadəcə olaraq Allah bizə belə oyunlarda yardım edir. "Qarabağ" Azərbaycan futbolunun "flaqman"ıdır. Qurban Qurbanov da Azərbaycanın ən güclü məşqçilərindən biridir”.