AFFA-nın səriştəsizliyinin növbəti sübutu

Ölkənin ən geniş coğrafiyasını əhatə edən və regionlarda futbolun inkişafı baxımından həyatı əhəmiyyət kəsb edən AFFA Region Liqası tamamilə iflic vəziyyətinə salınıb. Yeni mövsümün başlanması gözlənilən bir vaxtda AFFA bu yarışı təşkil etmək üçün lazımi iradəni ortaya qoya bilmir. Bu, idarəetmə qabiliyyətinin çatışmazlığını açıq-aşkar göstərir. Mövcud vəziyyət futbol ictimaiyyəti tərəfindən ciddi tənqid olunur, yeni rəhbərliyinin idarəçilik səriştəsizliyi hər ötən gün daha qabarıq önə çıxır.

Region futbolu: Gözəl xatirələrdə qalan mövsüm

2023/2024 mövsümündə AFFA Region Liqası çərçivəsində Cənub (8 komanda), Mərkəz (7 komanda), Şimal A qrupu (9 komanda), Şimal B qrupu (8 komanda) və Qərb (8 komanda) regionlarında oyunlar təşkil olunmuşdu. Hər bir oyun, hər bir final səhnəsi futbola olan sevginin regionlarda da nə qədər böyük olduğunu göstərirdi. Şamaxı şəhər stadionunda keçirilən final oyunu “Şimal” və “Hypers” komandalarını penaltilər seriyasına apararaq, futbol həvəskarlarının yaddaşında iz buraxmışdı. “Şimal” komandasının “Hypers” üzərində penaltilər seriyasında qazandığı qələbə bu liqanın nə qədər əhəmiyyətli olduğunu bir daha göstərdi. Lakin görünən odur ki, bu, sadəcə olaraq keçmişin xatirələri kimi yaddaşlarda qalacaq. Ötən mövsümün ardından 2024/2025-ci illər mövsümü üçün tam susqunluq hökm sürür. AFFA yeni mövsümü başlatmaqda acizdir. Şəffaflıqdan uzaq yanaşmalar, qeyri-mütəşəkkil proses və tələsik açıqlamalar bu iflasın açıq nişanıdır. Bu mövsümün niyə keçirilmədiyi sualını AFFA-nın idarəçiliyi cavabsız qoyur. Region futbolunun can damarı olan bu liqanı iflic vəziyyətinə salan AFFA-nın buna açıqlama verməməsi, futbol ictimaiyyətində dərindən narahatlıq yaradır.

Formal tenderlərin arxasındakı reallıq

Ötən ilin avqust ayında AFFA Region Liqası üçün komandaları geyim dəsti ilə təmin etmək məqsədilə tender elan etdi. Amma bu tenderin nəticələri ictimaiyyətə açıqlanmadı. Bu qeyri-şəffaf yanaşma idarəetmədə problemin mövcud olduğunu göstərir. Həmçinin, tenderin elan edilməsindən sadəcə 8 gün sonra, avqustun 14-də, yeni mövsümün qeydiyyat prosesinin başlayacağı haqda məlumat verildi. Amma bu prosesin nəticələri haqda hər hansı məlumat yoxdur. Neçə komanda qeydiyyatdan keçdi? Məqsəd yeni komandalar cəlb etmək idi? Liqaya maraq əldə edilmədi? Assosiasiya bu sualları cavablandırmaqdan qaçır.

Boş vədlər

Dekabr ayında mətbuatda yayılan məlumatlarda Region Liqasının 40-45 komandanın iştirakı ilə keçiriləcəyi qeyd olunurdu. Ancaq artıq 2025-ci ilə daxil olmuşuq və bu vədlər hələ də reallığa çevrilməyib. Yalançı vədlərin arxasında gizlənən xaos, AFFA-nın şəffaflıqdan uzaq idarəetmə strategiyasını gözlərin qarşısında ifşa edir.

AFFA mətbuat katibi vasitəsilə daha irəli gedərək, 56 komandanın 4 zona əsasında yarışacağını, liqanın fevralın 2-də start götürəcəyini bildirdi. Bu liqa haqda konkret planların olmaması vəziyyətin ciddiliyini daha da artırır və təbii olaraq ortaya bir neçə (təqvim, oyun meydanları, maliyyə və inventar təminatı) sual çıxarır.

Zəif idarəetmənın acı nəticəsi

AFFA Region Liqasını keçirə bilməyərək ölkənin ən vacib futbol strukturunu zədələyir. Tender prosesindəki qeyri-şəffaflıq, qeydiyyat prosedurlarının qeyri-ciddi yanaşma, kadr potensialının olmaması, futbol idarəetmə sistemindəki səriştəsizlik, region futboluna ögey münasibət və bunun kimi digər yanaşmalar ciddi fəsadlara səbəb ola bilər. Futbol ictimaiyyəti artıq bu cür şəraitlə barışmaq niyyətində deyil. AFFA-dan tələb olunur ki, Region Liqasının bərpası üçün şəffaf, konkret planları ictimaiyyətlə bölüşsün. Region Liqasını təşkil etmək, sadəcə bir futbol yarışı deyil, regionlarda futbola olan marağı canlandırmaq üçün vacib bir addımdır.

TAĞI