Rövlan Muradov: “Limitin ləğvi azərbaycanlı futbolçuların ziyanına olacaq”

“Sumqayıt”ın yarımmüdafiəçisi Rövlan Muradovun Futbolxeber.az saytına müsahibəsi

- Artıq məşqləri bərpa etmisiniz. Yeni il sonrası komandada vəziyyət necədir?

- Hər şey qaydasındadır. Fasilə müddətində normal dincəlmək mümkün oldu. Artıq işimizə qayıdıb ikinci dövrənin hazırlıqlarına başlamışıq.

- Fasilə müddəti bu dəfə çox az oldu. Bu məqam mövsümün qalan hissəsinə hazırlaşmaq baxımından hansı çətinliklər yaradacaq?

- ⁠Düzdür, əvvəlki illərlə müqayisədə bu dəfə fasilə müddəti az idi. Lakin düşünürəm və ümid edirəm ki, bu amil hər hansı çətinlik yaratmaz.

- Ümumilikdə, mövsümün ilk hissəsini “Sumqayıt” üçün necə dəyərləndirmək olar?

- Tam da yaxşı deməzdim. Çünki bəzi oyunları uğursuz keçirdik. Elə matçlar oldu ki, uduzmalı deyildik, lakin yekunda meydanı xalsız tərk etdik. İnanıram ki, fasilədən sonra vəziyyətimizi yaxşılaşdıra biləcəyik. Daha yaxşı olmaq və azarkeşləri sevindirmək üçün çox çalışmalıyıq.

- Vaqif Cavadov komandaya müvəqqəti baş məşqçi kimi gəlmişdi. İndi isə yeni müqavilə imzalanacağı deyilir. Demək olar ki, Cavadovun rəhbərliyi altında “Sumqayıt” etimadı doğrulda bildi?

- Bu suala cavab olaraq yalnız onu deyə bilərəm ki, ⁠bizim işimiz meydanda, baş məşqçimizin verdiyi tapşırıqları yerinə yetirib layiqli mübarizə aparmaqdır.

- Mövsümün ikinci yarısından gözləntiləriniz nədir?

- Məqsədimiz ⁠maksimum xallar toplamaq və turnir cədvəlində mövqeyimizi yaxşılaşdırmaqdır. Daha yuxarı pillələrdə qərarlaşmaq istəyirik. Bunun üçün də əlimizdən gələni edəcəyik.

- Mətbuatda adınız “Neftçi” ilə hallanırdı. “Ağ-qaralar”dan, yaxud hansısa digər klubdan təklif almısınız?

- Xarici menecerim var. O, eləcə də burada atamla əlaqə saxlanılır. Bu işlərlə onlar məşğul olur. Ona görə də konkret bir söz deyə bilmərəm.

- Son günlər Azərbaycan Premyer Liqasında legioner limitinin ləğv olunacağı barədə xəbərlər yayılıb. Limit ləğv olunsa, bu, azərbaycanlı futbolçuların xeyrinə olar, yoxsa ziyanına?

- Düşünürəm ki, ziyanına. Çünki limit olduğu zamanı çox azərbaycanlı futbolçular üzə çıxıb. Daha əvvəl limit 6+5 idi və 1 gənc, 21 yaşadək olan oyunçu start heyətində yer almalı idi. Bu da avtomatik U-21 millisi üçün 8 futbolçu demək idi. İndi isə 10 komanda var. Hazırda limit 7+4-dür və bu halda 40 azərbaycanlı futbolçu meydanda olur. Əgər limit ləğv olunsa, bu say avtomatik minimuma enəcək.

İbrahim Cəfərov