Riad Rəfiyevin “Sumqayıt” azarkeşlərinə müraciəti: “Yeni-yeni uğurları birlikdə qazanacağıq”

"Sumqayıt"ın prezidenti Riad Rəfiyev 31 dekabr - Dünya Azərbaycanlılarının Həmrəyliyi günü və Yeni illə bağlı klubun azarkeşlərinə müraciət edib.

Futbolxeber.az saytının məlumatına görə, klubun mətbuat xidmətinin yaydığı müraciətdə deyilir:

- Əziz "Sumqayıt" azarkeşləri!

Hər birinizi Dünya Azərbaycanlılarının Həmrəyliyi günü və qarşıdan gələn Yeni il bayramı münasibətilə təbrik edirəm.

Dərin kədər və təəssüf hissi ilə xatırlatmaq istəyirəm ki, ilin son günlərində xalqımız ağır və faciəvi xəbərlə üz-üzə qaldı. Qazaxıstanın Aktau şəhəri yaxınlığında qəzaya uğramış Azərbaycan Hava Yollarına məxsus təyyarədə həlak olanların ailələrinə dərin hüznlə başsağlığı verir, yaralılara şəfa arzulayıram. Ümid edirəm ki, mətanətli Azərbaycan xalqı bu çətinliklərin də öhdəsindən gələcək və gələcəyə daha inamlı addımlayacaq.

Ümumiyyətlə isə geridə qalan 2024-cü il həm klubumuz, həm də sumqayıtlı futbolsevərlər üçün uğurlu keçdi.

İlin ilk aylarında uzun müddətdən sonra Mehdi Hüseynzadə adına Sumqayıt Şəhər Stadionu yenidən klubumuzun istifadəsinə verildi və komandamız açılış oyununda parlaq qələbə qazandı.

Bundan əlavə, yarış boyunca daim yuxarı pillələrdə yer alan "Sumqayıt" mövsümün sonunda UEFA Konfrans Liqasında oynamağa haqq qazandı.

Həmçinin "Sumqayıt" Futbol Akademiyasının müxtəlif yaş qrupları üzrə komandaları uğurlu nəticələr əldə etdi. U-17 komandamız isə yarışı çempion kimi başa vurdu.

"Sumqayıt"ın qadınlardan ibarət komandası da ilin uğurluları sırasında idi. Belə ki, başa çatan mövsümdə əsas rəqibi ilə eyni xal toplasa da, sadəcə qol fərqi ilə çempionluğu əldən verən komandamız Yüksək Liqanın gümüş medallarını qazandı.

Əziz azarkeşlər, biz bu uğurları sizin müstəsna dəstəyiniz və köməyinizlə qazandıq. Təsadüfi deyil ki, doğma Mehdi Hüseynzadə adına Sumqayıt Şəhər Stadionunun açılışından sonra ölkə çempionatının 3 matçında anşlaq qeydə alındı. İlin həm bir oyunda ən çox, həm də orta hesabla ən çox azarkeşin izlədiyi oyunlar məhz "Sumqayıt"ın matçları oldu.

"Sumqayıt" Futbol Klubunun prezidenti olaraq bildirmək istəyirəm ki, yeni ildə də klubumuzun uğurlu çıxışı, inkişafı və siz azarkeşlərin daha güclü bir komandaya azarkeşlik etmələri üçün müəyyən planlarımız, layihələrimiz var. Sumqayıt futbolunun inkişafı üçün əlimizdən gələni edəcəyimizdən əmin ola bilərsiniz.

Həmçinin bu yolda sizin dəstəyiniz də bizim üçün çox vacibdir. Ümid edirik və arzulayırıq ki, ötən il olduğu kimi, yeni ildə də komandamıza daim dəstək olacaqsınız və yeni-yeni uğurları birlikdə qazanacağıq!

Bir daha hər birinizi təbrik edir, işlərinizdə uğurlar arzulayıram!