Konovalov: “Neftçi” ilə oyunda qələbə bizim üçün çox vacibdir”

“Çətin oyun alındı. Hava çox küləkli idi. Topu vururdun, lakin əks istiqamətə gedirdi. Bu səbəbdən də matçın keyfiyyəti yüksək deyildi. Bu da qapılar qarşısında təhlükəli epizodlar yaratmağa mane olurdu”.

Futbolxeber.az saytına müsahibəsində bu sözləri “Turan Tovuz”un qapıçısı İvan Konovalov Azərbaycan Premyer Liqasının XVII turunda “Zirə”yə qarşı keçirdikləri oyun barədə danışarkən deyib.  

Rusiyalı qolkiper səfərdə oynamalarına baxmayaraq, qazanılan 1 xalın onları qane etmədiyini bildirib: “Rəqibin adı, yaxud evdə deyil, səfərdə oynamaq bizim üçün önəmli deyil. Bizə həmişə qələbə faydalıdır. Ona görə də qolsuz bərabərlikdən razı qala bilmərik”.

O, qarşıdakı “Neftçi” ilə matça yalnız 3 xal üçün çıxacaqlarını söyləyib: “Oyuna çox ciddi hazırlaşırıq. Hədəfimiz 3 xaldır. Doğma azarkeşlərimiz önündə oynayacağıq. İlin son matçında fanatlarımızı sevindirmək istəyirik. “Neftçi” ilə oyunda qələbə bizim üçün çox vacibdir”.

İ.Konovalov hazırda istirahət deyil, yalnız “Neftçi” ilə görüş barədə düşündüklərini vurğulayıb: “Bəli, bu, ilin son oyunudur. Lakin hazırda istirahət barədə düşünmürük. Hamımızın fikri “Neftçi” ilə qarşılaşmadadır”.

30 yaşlı qapıçı turnir cədvəlinə nəzər yetirmədiklərini qeyd edib: “Hədəf 3 xal qazanmaqdır. Turnir cədvəlinə heç baxmırıq. Çünki indi bunun elə bir əhəmiyyəti yoxdur. Turnir cədvəlinə mövsümün sonunda nəzər yetirmək lazımdır”.

Fərəc Aslanov