“Ayın qolu”nun müəllifi: “Kiminsə haqqına girmək istəmirəm, yaxşı qollar var idi”

“Ayın qolu” layihəsi çərçivəsində noyabr ayının ən yaxşı qolunun müəllifi olan "Neftçi"nin futbolçusu Murad Məmmədovun Futbolxeber.az saytına müsahibəsi

- “Ayın qolu” layihəsi çərçivəsində qalib oldunuz. Namizədlərin siyahısı açıqlananda birinci olacağınızı gözləyirdiniz?

- Yaxşı qollar var idi. Heç kimin haqqına girmək istəmirəm. Münsiflərin seçimi məni xeyrimə oldu. Buna görə çox şadam.

- 11 münsifdən 9-u sizə üstünlük verdi. Demək olar ki, tam üstünlüklə qalib oldunuz...

- Allah hər birindən razı olsun. Sağ olsunlar ki, mənə səs verdilər, qalib etdilər. Sevinirəm. Əlimdən gələni edəcəyəm ki, bundan sonra da uğur qazanım.

- Seçim imkanı sizdə olsaydı, digər 4 qoldan hansını ən yaxşı seçərdiniz?

- Hansınısa seçmək bir qədər çətindir. Çünki həqiqətən də hər birinin ayrı-ayrılıqda gözəlliyi var. Mikelsin iki qolu namizədlər sırasında idi. Onun xüsusən “Sumqayıt”a vurduğu qol baxımlı alınmışdı.

- Bir tərəfdən mükafata qovuşdunuz, digər tərəfdən də “Kəpəz” üzərində çətin də olsa qələbə qazandınız...

- Vacib olan qələbə idi. Əsas odur ki, 3 xal əldə etdik. Çalışmalıyıq ki, növbəti oyunlarda da bu qələbənin ardını gətirək.

- Rəqib hesabı 1:2 etdikdən sonra düşünmədiniz ki, “Şamaxı” ilə oyundakı ssenari təkrarlanacaq?  

- Xeyr, o barədə düşünmədik. Əslində, 2:0-dan sonra da fərqlənmək istəyirdik. Lakin alınmadı. Rəqib fərqi azaltdı. Buna görə də matçın sonu gərgin keçdi. Yekunda istəyimizə çatdıq.

- Qarşıdan ilin son oyunu gəlir. “Turan Tovuz”la səfər matçından gözləntiləriniz nədir?

- Çətin oyun olacaq. “Turan Tovuz” yaxşı komandadır. Bu mövsüm çox inamlı təsir bağışlayırlar. Digər tərəfdən də yerli azarkeşlər komandaya çox güclü dəstək olurlar. Buna görə də bizi çox çətin matç gözləyir. Hər nə qədər ağır olsa da, məqsədimiz səfərdə qələbə qazanmaqdır.  

- “Neftçi”nin əsas heyətində debütunuz məhz Tovuz şəhər stadionunda baş tutmuşdu...

- Bəli, “Kəpəz”lə görüşdə. İlk dəfə idi “Neftçi”nin əsas komandasının heyətində meydana çıxırdım. İndi daha çox şans qazanıram. Əlimdən gələni edirəm ki, komandama faydalı olum. Bundan sonra da məqsədim “Neftçi”yə xeyir verməkdir.

İbrahim Cəfərov