Buz-buz “oyunu”... və ya “Şamaxı”nın planı necə baş tutmayıb?

Dünən Şamaxıda Azərbaycan futbolu adına daha bir xoş olmayan hadisə yaşandı. “Şamaxı” və “Səbail” futbol klubları olsalar da, güclərini hokkeydə sınadılar. Bəli, məhz hokkeydə. Çünki buzda futbol oynamırlar. Futbolu otun üzərində oynayırlar, otun...

Bu foto dünən 13:00 radələrində çəkilib. Yəni “Şamaxı” - “Səbail” oyununun başlanmasına 1 saat qalmış. Bu fotonu görən kimi adam istər-istəməz düşünür: oyunun başlanmasına 1 saat qalıbsa, meydança nə üçün qardan təmizlənməyib?  

Sonradan Peşəkar Futbol Liqası (PFL) məlumat yaydı ki, “hava şəraiti ilə əlaqədar olaraq Şamaxı şəhər stadionunun ot örtüyü qarla örtülüb. Stadionunun tam hazır vəziyyətə gətirilməsini nəzərə alan PFL-in idarə heyətinin qərarına əsasən matç əvvəldən müəyyənləşdirildiyi kimi 14:00-da yox, 14:20-də start götürəcək”.

Bu yerdə ortaya daha bir neçə sual çıxır: Meydançanı təmizləmək mümkün idisə, bu, niyə əvvəldən edilməyib? 20 dəqiqə elə də böyük zaman kəsiyi deyil. Bu halda 20 dəqiqəyə nə dəyişəcək? Yaxud PFL-in qeyd etdiyi kimi, “Stadionunun tam hazır vəziyyətə gətirilməsi” mümkün olacaqmı?

Bu foto isə oyunun gedişi zamanı çəkilib. Göründüyü kimi, komandalar təkcə bir-biriləri ilə deyil, həm də buzla mübarizə aparırlar. Yəni “Stadionunun tam hazır vəziyyətə gətirilməsi” mümkün olmayıb.

Bütün suallara cavab tapmaq üçün kiçik araşdırma apardıq və hər şey məlum oldu. Əldə etdiyimiz məlumata görə, “Şamaxı” meydanı qardan qəsdən təmizləyib. Belə ki, hazırda heyət baxımından ciddi problem yaşayan bölgə təmsilçisi bu matçın təxirə salınmasını istəyib. Çünki “Səbail”lə oyun “Şamaxı” üçün Premyer Liqada qalmaq baxımından mühüm əhəmiyyət kəsb edirdi. Bu matçda qalib gələcəyi halda Ayxan Abbasovun komandası rəqibindən 8 xal aralanacaqdı. Matçın başqa vaxta keçirilməsi üçün PFL-ə müraciət də olunub. Lakin müsbət cavab alınmayıb. PFL-dən bildirilib ki, ən yaxşı halda görüş sabaha keçirilə bilər. Belədə “Şamaxı” meydana çıxmağa məcbur olub. Yekunda tam da olmasa, qismən meydan sahibləri istəklərinə çatıblar. Çünki indiki vəziyyətdə heç-heçə “Səbail”dən çox “Şamaxı”nın işinə yarayır. Hər halda əsas rəqiblərindən birinə uduzmamaqla komanda aradakı xal fərqini qoruyub.

Futbolxeber.az