Ayxan Abbasov: “Qışdan sonra tam başqa “Şamaxı” görəcəyik”

“Bilirdik ki, gərgin oyun olacaq. Hər iki komandaya xal lazım idi, hava şəraiti oynamağa çətinlik yaradırdı. Belə meydançada oynamaq çox çətindir. İki komandanı da təbrik edirəm. Ən əsası odur ki, bu gün zədələr olmadı. Bizim üçün önəmli 1 xaldır”.

Futbolxeber.az saytının məlumatına görə, bu sözləri “Şamaxı”nın baş məşqçisi Ayxan Abbasov Azərbycan Premyer Liqasının XVII turunda “Səbail”lə qolsuz bərabərə qaldıqları oyundan sonra deyib.

Mütəxəssis çox böyük itkiləri olduqlarını bildirib: “Qış fasiləsinə kimi mübarizə aparacağıq. Gənc futbolçular çox şans qazanır. Çətindir, amma səbir etməliyik. Qışdan sonra tam başqa "Şamaxı" görəcəyik. Mən buna inanıram. Heyətimizi gücləndirəcəyik və sona qədər mübarizə aparacağıq. Hər kəsi səbrli olmağa çağırıram”.

“Cavid Hüseynov bildirdi ki, meydançanı daha yaxşı vəziyyətə gətirmək olardı. Siz necə düşünürsünüz?” sualını A.Abbasov belə cavablandırıb: “Əvvəllər çempionatımız tez qurtarırdı. İndi mövsüm həm tez başlayır, həm də gec bitir. Qəfil qar yağsa, bir çox yerdə belə olacaq. Bütün stadionlar qarlı havaya hazır olmalıdır. Qış aylarında oynayırıqsa, stadionlarda lazımi texnikalar olmalıdır”.