Mərdəkanda “çöl-biyaban”dı, Masazırda “güllük-çiçəklik”?

Bir fağır “Araz-Naxçıvan” tapmışıq, sağdan da döşüyürük, soldan da. Komanda uduzur, deyirik niyə uduzur? Udur, deyirik niyə 1:0 udur? Hər oyunda 5 qol vursun də. Komanda liderliyə yüksəlir, ilişməyə bəhanəmiz qalmır, keçirik azarkeş məsələsinə. Bəs niyə “Dalğa Arena”nın tribunaları tıklım-tıklım dolmayıb? Nə üçün minlərlə futbolsevər Naxçıvan klubunu Mərdəkanda dəstəkləmir?..

Sonra fikirləşirsən ki, axı azarkeş məsələsi təkcə “Araz-Naxçıvan”ın deyil, ümumiyyətlə Azərbaycan çempionatının problemidir. Guya dəyişməz çempion “Qarabağ”ı çempionat oyunlarında nə qədər azarkeş dəstəkləyir ki? Yaxud “Neftçi”nin bəyəm hər ev oyununda “Neftçi Arena” dolur? Yoxsa “Zirə”nin, “Sabah”ın ev oyunlarına minlərlə azarkeş gəlir?..

Srağagün elə “Araz-Naxçıvan”ın “Turan Tovuz”la ev oyunu bitdiyi dəqiqələrdə “Sabah” öz meydanında “Səbail”i qəbul edirdi. Havada kəsici soyuq olsa da, etməyib tənbəllik “Bank Respublika Arena”nın boş tribunalarından 1-2 foto çəkdim, buyurun siz də baxın.

İndi siz deyin, məgər Masazırda azarkeş əlindən iynə atsan, yerə düşməyəcək? 90 dəqiqə ərzində tribunada biri öskürəndə, futbolçular belə eşidirdilər.

O zaman ortaya haqlı sual çıxır. Biz niyə obyektiv ola bilmirik? Halbuki obyektiv yanaşsaq, “Araz-Naxçıvan” azarkeş məsələsində Premyer Liqada ən son tənqid olunacaq klubdur. Çünki digərlərindən fərqli olaraq “Araz” Naxçıvanda deyil, Bakıda oynayır. İllərdi Masazırda məskunlaşan “Sabah”ın ev oyununa iki tək, bir cüt azarkeş gəlirsə, hansı əsasla “Araz-Naxçıvan”dan Mərdəkan tribunalarını doldurmağı istəyirik?..

Futbolxeber.az