Monteneqrolu müdafiəçi: “Bu, “Sumqayıt”ın gördüyüm ən yaxşı oyunu idi”

“Bu, komandada çıxış etdiyim dövrdən gördüyüm ən yaxşı oyunumuz idi. Bütün matç boyu dominant çıxış etdik, bunun da nəticəsini yekunda gördük. Rəqibə çox qol vəziyyəti yaratmağa imkan vermədik”.

Futbolxeber.az saytına müsahibəsində bu sözləri “Sumqayıt”ın müdafiəçisi Miloş Miloviç Azərbaycan Premyer Liqasının XIV turunda “Şamaxı” üzərində qazanılan 2:1 hesablı qələbəni şərh edərkən deyib.

O, gələn tur “Zirə”yə qarşı keçiriləcək matça çox ciddi hazırlaşacaqlarını bildirib: “Bilirik ki, “Zirə” güclü rəqibdir. Meydana da xüsusi motivasiya ilə çıxacaqlar. Amma biz də yaxşı bir xətt yaxalamışıq. Düşünürəm ki, çıxışımızı bu şəkildə davam etdirə bilsək, Zirə səfərindən də yaxşı nəticə ilə qayıda bilərik”.

Monteneqrolu futbolçu ötənilki “Sumqayıt”la cari mövsümdəki kollektivi belə müqayisə edib: “Bilirəm ki, keçənilki komandanın hədəfi avrokuboklar idi. Bu il isə mövsümə heç də yaxşı başlamadıq. Amma zamanla yenidən o hədəfə doğru irəliləyə bilərik”.

Fərəc Aslanov