Fernandu Santuşun yalanları...

İnternetdə bir qızla yazışarsan, sonra real həyatda görüşəndə görərsən ki, fotosu feyk imiş. Əslində, profil şəkli real həyatdakı görünüşündən tam fərqlənir. Arada düşünürəm ki, milli komandamızın baş məşqçisi Fernandu Santuşu da belə aldadıblar. Sadəcə burda vəziyyət fərqlidir. Sanki Azərbaycan millisi haqda təsəvvürü olsun deyə, Santuşa yığmamızın əvvəlki matçlarını deyil, Monqolustanın, yaxud San Marinonun oyunlarını göstəriblər. Belə düşündüyümə görə məni qınamayın. Az əvvəl Fernandu Santuşun İsveçlə oyundan öncə təşkil olunan mətbuat konfransını izlədikdən sonra məhz bu cür düşünməyə məcburam. Gələcəklə bağlı ümidli fikirlərini qoyuram bir kənara. Amma “Oyunumuzda böyük dəyişiklik var” demək heç bir məntiqə sığmır.

Azərbaycan millisi tarixi rəzalətin - San Marino, Cəbəllütariq, Andorra kimi ən zəiflərin yer aldığı D Liqasına yuvarlanmaq ərəfəsindədir, cənab Santuş isə hələ də “oyunumuzda böyük dəyişiklik var” deyib, bizə yaxşı oyun nağılı danışır. Cənab Santuş, vallah, biz - azərbaycanlı futbolsevərlər, jurnalistlər - buna qədər “yaxşı oyun” nağıllarını çox eşitmişik. Bizə nəticə lazımdır, nəticə! Hansı ki, sizdən əvvəlkilərin dövründə pis-yaxşı, az-çox olsa da, var idi.

Biz nağıl danışmırıq. Bəziləri kimi Rövşən Nəcəfin, Balakişi Qasımovun, Sərxan Hacıyevin gözündə yaxşı görünmək üçün nağıl da cızma-qara etmirik. Rəhmətlik Böyükağa Hacıyev demişkən, kimlərinsə yanında xal qazanmaq üçün sual da vermirik. Dediklərimiz fakta söykənir.

Məsələn, Fernandu Santuşun rəhbərliyi altında milli komandamız keçirdiyi 5 oyunun heç birində qələbə qazana bilməyib. Bu, faktdır. Portuqaliyalı mütəxəssisin “oyunumuzda böyük dəyişiklik var” fikri subyektiv yanaşmadır. Niyəsini də izah edək. Götürək millimizin Santuşun gəlişindən öncəki son oyununu. İyunun 11-də Arif Əsədovun rəhbərliyi altında Azərbaycan millisi yoxlama matçında Estoniyadan daha güclü olan Qazaxıstan üzərində 3:2 hesablı qələbə qazanmışdı. Həmin 90 dəqiqədə Azərbaycan yığması Santuşun rəhbərliyi altında keçirdiyi 5 oyundakı qədər - 3 qol vurub. Yaxud götürək statistikanı. Santuşun bəh-bəhlə təqdim etdiyi Estoniya ilə matçda milli komandamızın qapı istiqamətində endirdiyi 15 zərbədən cəmi 3-ü “çərçivə”yə gedib. Qazaxıstanla görüşdə millimizin rəqib qapısına endirdiyi zərbə sayı 25 olub ki, onlardan 8-i “çərçivə”yə gedib. Bu halda Fernandu Santuş hansı inkişafdan, irəli getməkdən danışır? İnciməyin, amma belə deməklə siz Arif Əsədovun haqqına girirsiniz, cənab Santuş.

Amma Fernandu Santuşun haqqına girdiyi tək Arif Əsədov deyil. Portuqaliyalı De Byazinin də haqqına girir. Millimiz italiyalı mütəxəssisin rəhbərliyi altında ilk oyunda öz meydanında uduzduğu İsveçi düz 1 il əvvəl Bakıda 3:0 hesabı ilə məğlub etmişdi. Ondan 1 ay əvvəl isə De Byazili millimiz Santuşun iki oyunda məğlub edə bilmədiyi Estoniyanı səfərdə 2:0 hesabı ilə üstələmişdi... Uzun-uzadı uzatmağa ehtiyac yoxdur. Fernandu Santuş hər nə qədər millimizin oyununda inkişaf olduğunu desə də, əlahəzrət fakt qarşısında acizik - Azərbaycan millisi tarixi rəzalətin - D Liqasına yuvarlanmağın bir addımlığındadır. Və bu rəzalətə heç nə haqq qazandıra bilməz. Rövnəq Abdullayevin dövrü belə getdi, Elxan Məmmədovun zamanında elə oldu - bunlar hamısı bəhanədir, kimlər üçünsə təsəllidir. Estoniya kimi komandanı 2 oyunda məbləğ edə bilməməyin bəhanəsi ola bilməz, bəylər, özünüzü aldatmayın!!!

İBRAHİM