Yeni başlanğıc üçün... - QEYD

Qara Qarayev bəlkə də bugünə qədər ən çox tənqid etdiyimiz futbolçulardan olub. Özü də karyerasının ən yaxşı vaxtlarında. Lakin tənqidlə yanaşı, biz həm də hər zaman haqsızlığa məruz qalanın yanında olmağa çalışmışıq. Son illər Qarayev Azərbaycan futbolunda tez-tez haqsızlıqla üzləşib. İstər “Qarabağ” azarkeşləri tərəfindən, istərsə də Roman Qriqorçuk tərəfindən. “Neftçi”dən ayrıldıqdan sonra Qara ilə bağlı mətbuatda müxtəlif xəbərlər yayıldı. Gah hansısa klubla maddi baxımdan razılıq əldə etmədiyi, gah da karyerasını bitirdiyi deyilirdi. Lakin hər dəfə təcrübəli yarımmüdafiəçiyə danışmaqla bağlı müraciətlərimiz cavabsız qalırdı. Belə təsəvvür yaranırdı ki, o, hər şeyi zamanın ixtiyarına buraxıb.

Bəlkə də yerində başqası olsaydı, çoxdan üsyan eləmişdi. Yaxın keçmişdə ölkənin ən yaxşılarından olan futbolçu əvəzedicilərin heyətində meydana çıxırdı... Ancaq bu dünyanın ədaləti var. Fikrimizcə, elə Qara özü də haqqında yazılanlara, deyilənlərə heç bir reaksiya göstərməməklə haqqın öz yerini tapmasını gözləyirdi.

Nəhayət, Qarayevin futbolsuz günləri başa çatdı. Az əvvəl “Araz-Naxçıvan” 32 yaşlı futbolçunun keçidini rəsmən açıqladı. Bu, Qara üçün yeni başlanğıcdır. Artıq onun karyerasında yeni səhifə açılır. Düzdür, Qara Qarayevin bundan sonra özünü təsdiqləməsinə ehtiyac yoxdu. Amma əminik ki, o, bu dəqiqə meydana çıxmaq, bütün gücü ilə mübarizə aparmaq üçün alışıb-yanır. Bacaracaqmı? Fikrimizcə, bəli, əzmi ilə, xarakteri ilə Qara tükənmədiyini, əksinə, ona qarşı edilən haqsızlıq olduğunu göstərəcək. Axı bu dünyanın ədaləti var...

Futbolxeber.az