“Ayın qolu”nun müəllifi: “Bu, məşqlərdəki zəhmətimin bəhrəsidir”

“Araz-Naxçıvan”ın yarımmüdafiəçisi Bernardo Diasın Futbolxeber.az saytına müsahibəsi

- “Zirə” ilə ev oyununda heç-heçə ilə kifayətləndiniz. 1:1-lik bərabərliyi necə şərh edərdiniz?

- Yaxşı oynadıq. İlk hissədə də üstünlüyümüz var idi. Düzdür, bundan da yaxşı oyunlarımız olub. Bu, ən yaxşıllardan deyildi. Lakin istənilən halda sona qədər mübarizə apardıq. Biz heç vaxt təslim olmuruq.

- İkinci hissədə üstünlüyü ələ alsanız da, bu, qələbə üçün yetmədi. 3 xal qazanmaq üçün nə çatışmadı?

- İkinci hissədə dəyişikliklər oldu. Sonradan oyuna qoşulanlar da komandaya kömək oldular. Topu özümüzdə daha çox saxlayırdıq. Bəlkə ikinci qolu da vura bilərdik. Lakin vaxt qalmamışdı. Xoşbəxt sonluğa inanırdıq. Ümumi götürdükdə 1 xal yaxşı nəticədir.

- Bu matçda “Araz-Naxçıvan” 1 xal qazandı, yoxsa 2 xal itirdi?

- Məncə, bərabər oyun idi. Heç-heçəni ədalətli nəticə hesab edirəm. Bir xal götürməyimiz yaxşıdır.

- Qarşıda sizi sıx qrafik gözləyir. Kubok və təxirə salınmış oyunu da nəzərə alsaq, 13 gündə 4 matça çıxacaqsınız. Fiziki cəhətdən nə dərəcədə çətin olacaq?

- Pozitiv yanaşırıq. Az oynayan futbolçularımız var. Qarşıdakı matçlarda onlar da şans qazana bilərlər. Baş məşqçimizin rotasiya etməsi də mümkündür. Ona görə də hər hansı çətinlik yaşayacağımızı düşünmürəm.

- Növbəti turda səfərdə “Neftçi” ilə qarşılaşacaqsınız. “Araz-Naxçıvan” yeni baş məşqçinin rəhbərliyi altında uduzmayan “Neftçi”yə ilk məğlubiyyəti yaşada bilər?

- İndi kubok oyununu düşünürük. Məqsədimiz növbəti mərhələyə adlamaqdır. Yalnız ondan sonra “Neftçi” barədə düşünəcəyik. Məşqçilər korpusu lazımi məlumatları bizə çatdıracaqlar. “Neftçi”ni səfərdə məğlub edə bilərik. Çox yaxşı komandamız var.

- Sentyabrda Peşəkar Futbol Liqasının keçirdiyi “Ayın qolu” layihəsinin qalibi oldunuz. Təəssüratlarınız necədir?

- Əla. Bu, məşqlərdəki zəhmətimin bəhrəsidir. Komanda yoldaşlarıma, məşqçilər korpusuna, bütün kollektivimizə minnətdaram. Mənə səs verən hər kəsə təşəkkürümü bildirirəm. Düzdür, Bakıdakı oyunlarda azarkeş sayı çox olmur. İnanıram ki, Naxçıvanda oynayarkən bizi daha çox azarkeş dəstəkləyəcək. Bu da bizim üçün əlavə motivasiya olacaq.

Fərəc Aslanov