Qərəz, sifariş, yoxsa şəxsi maraq?

Azərbaycan futbolunda klub prezidentləri arasında son zamanlar adı mətbuatda ən çox hallanan Riad Rəfiyevdir. Baxmayaraq ki, o, nə flaqman “Neftçi”nin, nə Azərbaycan futbolunun 1 nömrəsi olan “Qarabağ”ın, nə də hər il milyonların dövr etdiyi “Sabah”ın prezidentidir. Rəfiyev “Sumqayıt”a rəhbərlik edir. Hansı ki, onun gəlişinə qədər bu klub demək olar ki, həmişə autsayder hesab olunub. Bəs bu halda nədir Rəfiyevi mətbuat üçün belə “maraqlı” edən?

Bəli, Riad Rəfiyev əvvəl menecerliklə məşğul olub. Eləcə də AFFA-nın seleksiya məsələləri üzrə baş koordinatoru olarkən Emin Mahmudov, Ramil Şeydayev kimi futbolçuların milli komandamızın heyətinə cəlb olunmasında vasitəçilik edib.

Lakin 2018-ci ilin 9 martından Rəfiyev “Sumqayıt”ın prezidentidir. Məhz onun gəlişindən sonra “gənclik şəhəri”nin təmsilçisi sözün həqiqi mənasında ağ günə çıxıb. Bunu biz yox, əlahəzrət statistika deyir. Belə ki, Riad Rəfiyevin prezidentliyi dövründə “Sumqayıt” tarixində ilk dəfə Azərbaycan çempionatında medal qazanıb, iki dəfə ölkə kubokunda finala yüksəlib, eləcə də 3 dəfə avrokuboklara vəsiqə əldə edib. 6 il ərzində məhdud büdcəsi olan klub üçün bu, böyük uğur deyil, bəs nədir?

Bu halda Riad Rəfiyevə qarşı “hücum”ların səbəbi nədir? Gəlin kiçik bir araşdırma edək. Quqlda Riad Rəfiyev yazıb, axtarış veririk. “Riad Rəfiyev “Sumqayıt”dan göndərilir” - bu ilin aprelinin xəbəri, “Riad Rəfiyev "Sumqayıt"dan göndərilə bilər” - 2022-ci ilin mayının xəbəri, “Sumqayıt”da Riad Rəfiyev dönəmi başa çatır?” - 2023-cü ilin dekabrının xəbəri, “Riad Rəfiyev "Sumqayıt"dan göndərilir?” - 2023-cü ilin avqustunun xəbəri və s. Gördünüyü kimi, artıq iki ildən çoxdur mətbuatda boşluq olanda Rəfiyev “Sumqayıt”dan “göndərilir”/“gedir”. Amma o, işinin başındadır. Elə son turda səfərdə “Səbail”i məğlub etdikləri matçdan sonra “Sumqayıt”ın Müşahidə Şurasının üzvləri ilə birgə paltardəyişmə otağına gələrək komandanı təbrik etdi. Heyif zarafatımız yoxdur, yoxsa deyərdik ki, Riad bəy, bəs deyirlər həbs olunmusunuz?

Kiminsə bostanına daş atmaq fikrindən uzağıq. Hərənin bir yolu, hərənin Sərxan Hacıyev demişkən, bir strategiyası var. Amma məhdud büdcəli kollektivi 6 ildə 3 dəfə Avropaya çıxarmış klub prezidenti barədə “idarəetmə fiaskosu” ifadəsini işlətmək kökündən yanlışdır. “Sumqayıt” kimi klubun 3 dəfə avrokuboklara vəsiqə qazanması, 2 dəfə kubokda final oynaması, 1 dəfə bürünc medal qazanması fiaskodursa, onda bəs məsələn, Maqsud Adıgözəlovun “Sabah”dakı fəaliyyəti nədir? Büdcəsi 10 milyondan az olmayan “Sabah”ın Premyer Liqaya gəlişi ilə Rəfiyevin “Sumqayıt”ın prezidenti təyin edilməsi demək olar ki, eyni vaxta təsadüf edib. Və bu 6 ildə “Sabah”dan büdcəsi minimum 3 dəfə az olan “Sumqayıt” daha çox uğur qazanıbsa, bu halda necə Rəfiyev pis idarəçi, Adıgözəlov isə gözün üstə qaşın var deyilməyən, mətbuatdan tənqidin t-sini də görməyən klub rəhbəri olur? Fikrimiz bu iki klub rəhbərini müqayisə etmək deyil. Sadəcə maraqlıdır ki, niyə “obyektiv” insanlar Rəfiyevi “xalq düşməni” elan edib, Adıgözəlovu “futbolumuzun xilaskarı” qismində görürlər? Məncə, səbəb aydındır... Sadəcə çox dərinə getməyə ehtiyac yoxdur. Hər halda heç kim çörəyi qulağına yemir...

Futbolxeber.az